ព័ត៌មានថ្មីៗ

អាជ្ញាធរជាតិអប្សរា អប់រំបរិស្ថានចំពោះពលករបម្រើការងារតាមការដ្ឋានជួសជុលប្រាសាទ និងពលករសម្អាតក្នុងឧទ្យានអង្គរ

បានផ្សាយនៅ ថ្ងៃទី 21 ខែ សីហា ឆ្នាំ2019 05:46 PM ដោយ ៖ អាជ្ញាធរជាតិអប្សរា

នាយដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា សហការជាមួយកម្មវិធីប្រព័ន្ធគ្រប់គ្រងបរិស្ថានអង្ករ ISO14001 2015 រៀបចំកម្មវិធីអប់រំបរិស្ថានដើម្បីផ្សព្វផ្សាយ និងអប់រំផ្នែកបរិស្ថានដល់ពលករជួសជុលប្រាសាទ និងពលករសម្អាតក្នុងរមណីយដ្ឋានអង្គរ ៣គោលដៅដែលកំពុងប្រចាំការនៅវង់តូច វង់ធំ និងតំបន់រលួស សរុបប្រមាណ១៦០នាក់។

កម្មវិធីនេះធ្វើឡើងដើម្បីផ្សព្វផ្សាយគោលនយោបាយបរិស្ថាន បង្កើនការយល់ដឹងផ្នែកបរិស្ថាន ជំរុញការចូលរួម ជំរុញការផ្សព្វផ្សាយ ជួយថែរក្សាបរិស្ថាន និងណែនាំដល់អ្នកលក់ដូរ និងភ្ញៀវទេសចរខ្មែរ ឱ្យកាន់តែទទួលបានទូលំទូលាយបន្ថែមទៀត។

ដោយឡែកកម្មវិធីនេះបានផ្តោតលើចំណុចសំខាន់ៗ៩ចំណុច រួមមាន៖
១)គោលនយោបាយបរិស្ថាន
២)តួនាទី និងការទទួលខុសត្រូវរបស់នាយកដ្ឋាន និងផែនការសកម្មភាពបរិស្ថាន
៣)បញ្ហាសំរាម និងបញ្ហាប្រឈម
៤)អង្គរជារមណីយដ្ឋានគ្មានផ្សែងបារី
៥)បំរាមចំពោះការប្រើប្រាស់ថង់ផ្លាស្ទិច
៦)បំរាមចំពោះការសេពគ្រឿងស្រវឹងគ្រប់ប្រភេទ និងអាហារក្នុងទីប្រាសាទ
៧)បំរាមចំពោះការក្រាលកន្ទេល និងអង្រឹងនៅកសិន្ធុអង្គរ
៨)ក្រមប្រតិបត្តិអង្គរ
៩)ការសម្លឹងមើល និងវាយតម្លៃពីមជ្ឈដ្ឋានខាងក្រៅចំពោះអង្គរ។

កម្មវិធីអប់រំបរិស្ថាននេះមានរយៈពេល៣ថ្ងៃ នៅទីតាំងខុសៗគ្នា ដោយថ្ងៃទី១ធ្វើនៅអង្គរវត្ត ត្រូវនឹងថ្ងៃទី១២ ថ្ងៃទី២ នៅភិមានអាកាសនា ត្រូវនឹងថ្ងៃទី១៥ និងថ្ងៃទី៣នៅប្រាសាទព្រះគោ ថ្ងៃទី១៩ ខែសីហា ឆ្នាំ២០១៩។ មួយផ្នែកនៃកម្មវិធីក៏មានសំណួរចម្លើយរវាងវាគ្មិន និងអ្នកចូលរួមទាំងអស់ពីបញ្ហាផ្សេងៗពាក់ព័ន្ធនឹងបរិស្ថាន ធ្វើឱ្យវគ្គបណ្តុះបណ្តាលកាន់តែអាចស្វែងយល់បានមួយកម្រិតទៀត៕










អត្ថបទ៖ លោក អ៊ុន មន្នីនីតា        រូបភាព៖ លោក អ៊ុន មន្នីនីតា
ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានបំពេញព្រះរាជបេសកកម្មប្រកបដោយភាពជោគជ័យលើទឹកដីនៃអតីតរាជធានីនៃអាណាចក្រខ្មែរ។ កាលពីថ្ងៃទី២៤ ខែឧសភា ឆ្នាំ២០១៦កន្លងទៅនេះ នាព្រះលានជល់ដំរីនៃទីក្រុងអង្គរធំដែលជាអតីតរាជធានីដ៏ឧត្តុង្គឧត្តមនាកំឡុងសតវត្សទី៩ដល់ទី១៥ បច្ចុប្បន្នស្ថិតក្នុងរមណីយដ្ឋានអង្គរ ព្រះអង្គបានយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីច្រត់ព្រះនង្គ័ល។ ព្រះរាជបេសកកម្មបន្ទាប់គឺ ព្រះអង្គទ្រង់យាងទៅបំពេញព្រះរាជទស្សនកិច្ចនៅតំបន់ប្រាសាទកោះកេរដែលក៏ជាអតីតរាជធានីក្នុងកំឡុងដើមសតវត្សទី១០ បច្ចុប្បន្នស្ថិតក្នុងខេត្តព្រះវិហារ ដើម្បីបួងសួងដល់ព្រះវិញ្ញាណក្ខន្ធអតីតព្រះមហាក្សត្រខ្មែរគ្រប់ជំនាន់ ដើម្បីប្រទានក្តីសុខដល់ប្រជានុរាស្ត្រទូទាំងនគរនៃព្រះរាជាណាចក្រកម្ពុជា។
ព្រះរាជពិធីច្រត់ព្រះនង្គ័លឆ្នាំនេះ ត្រូវបានរៀបចំឡើងនៅលើទឹកដីសៀមរាបអង្គរ នៅមុខព្រះលានជល់ដំរី នាព្រឹកថ្ងៃទី២៤ ខែឧសភា ឆ្នាំ២០១៦ ត្រូវនឹងថ្ងៃ៤រោច ខែពិសាខ ពុទ្ធសករាជ ២៥៦០ ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំ និងប្រជាពលរដ្ឋយ៉ាងច្រើនកុះករ។
ដើម្បីអបអរសាទរព្រះរាជពិធីច្រត់ព្រះនង្គ័ល ដែលប្រារព្ធឡើងនៅក្នុងបរិវេណមុខព្រះលានជល់ដំរី ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានោះ អាជ្ញាធរជាតិអប្សរានឹងចែកទឹកជូនបងប្អូនប្រជាពលរដ្ឋ និងភ្ញៀវទេសចរទាំងអស់ ដែលមកទស្សនាកម្មវិធីរយៈពេល៤ថ្ងៃដោយមិនគិតថ្លៃ គឺចាប់ពីថ្ងៃទី២៣រហូតដល់ថ្ងៃទី២៦ ខែឧសភា ឆ្នាំ២០១៦។ ទីតាំងចែកចាយទឹកមានពីរកន្លែងស្ថិតនៅផ្នែកខាងជើង និងខាងត្បូងនៃព្រះលានជល់ដំរី ដែលជាទីតាំងប្រារព្ធពិធី។
អាជ្ញាធរជាតិអប្សរា តាមរយៈក្រុមការងារសហគមន៍ប្រចាំស្រុកបា្រសាទបាគង នាព្រឹកថ្ងៃទី២៣ ខែឧសភានេះ បាននាំយកអំណោយសង្គ្រោះបឋមរបស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ទៅជូនប្រជាពលរដ្ឋមួយគ្រួសារដែលមានអាសយដ្ឋាននៅភូមិកញ្ជរ ឃុំរលួស ដែលរងគ្រោះដោយត្រូវខ្យល់ព្យុះដួលរលំផ្ទះទាំងស្រុង កាលពីដើមខែឧសភាកន្លងទៅ។
ក្រុមអ្នកជំនាញផ្នែកគ្រប់គ្រងទឹកនៃអាជ្ញាធរជាតិអប្សរាកំពុងរៀបចំប្រព័ន្ធទឹក ដោយបង្កប់ទុយោដាក់តាមបណ្តោយផ្លូវចូលពីខ្លោងទ្វារចូលទៅកសិណនៃប្រាសាទបន្ទាយស្រី។ ការរៀបចំប្រព័ន្ធទឹកនេះ គឺដើម្បីបញ្ជូនទឹកកុំឲ្យដក់នៅយូរពេលភ្លៀងធ្លាក់ម្តងៗ និងដើម្បីលើកតម្លៃទេសភាពវប្បធម៌នៃប្រាសាទ ជាពិសេស គឺសម្រួលដល់ការធ្វើដំណើររបស់ភ្ញៀវទេសចរក្នុងរដូវភ្លៀង។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
2
ថ្ងៃនេះ
:
1558
ម្សិលមិញ
:
1770
សប្តាហ៍នេះ
:
08124
ខែនេះ
:
0003328
សរុប
:
010591426