NEWS

យុវជនទទួលចំណេះដឹងច្រើនពីការគ្រប់គ្រងរមណីយដ្ឋានអង្គរ ក្រោយពីបានបញ្ចប់កម្មវិធីយុវជនស្ម័គ្រចិត្តសម្រាប់បេតិកភណ្ឌពិភពលោក នៅអង្គរ

Published on 19 August 2019 09:24 AM Post By ៖ Apsara National Authority

តាមរយៈកម្មវិធីយុវជនស្ម័គ្រចិត្តដើម្បីបេតិកភណ្ឌពិភពលោកនៅអង្គរ យុវជន១៨នាក់ មកពី៨ប្រទេស រួមមានកម្ពុជា កូរ៉េ បារាំង អូស្ត្រាលី កូឡុំប៊ី ប៊ុលហ្ការី ឥណ្ឌា និងចិន បានទទួលការបណ្តុះបណ្តាលអំពីការគ្រប់គ្រង ការអភិរក្ស និងការអភិវឌ្ឍប្រកបដោយចីរភាពក្នុងរមណីយដ្ឋានអង្គរ ព្រមទាំងបានធ្វើការផ្លាស់ប្តូរបទពិសោធន៍យ៉ាងច្រើនពាក់ព័ន្ធនឹងជាមួយវិស័យបេតិកភណ្ឌ ក៏ដូចជាការងារចូលរួមជាមួយសហគមន៍។

កញ្ញា Juanita Erasso យុវជនស្ម័គ្រចិត្តមកពីប្រទេស Colombia បានឱ្យដឹងថា នេះជាលើកទីមួយហើយដែលកញ្ញាបានចូលរួមជាយុវជនស្ម័គ្រចិត្តនៅរមណីយដ្ឋានអង្គរ និងបានស្វែងយល់អំពីការគ្រប់គ្រង ជួសជុល អភិរក្ស សហគមន៍ និងយល់ដឹងពីក្រមប្រតិបត្តិអង្គរដែលជាចំណុចដែលទេសចរគ្រប់រូបត្រូវប្រតិបត្តិ។ កញ្ញាបន្តថា រមណីយដ្ឋានអង្គរជាបុរាណដ្ឋានបុរាណវិទ្យាមានវិសាលភាពធំមួយ ហើយនៅទីនេះមានប្រជាជនរស់នៅ បន្តគោរពប្រតិបត្តិនូវជំនឿសាសនារបស់ខ្លួនយ៉ាងរស់រវើក។ រីឯការគ្រប់គ្រងបេតិកភណ្ឌវិញ មានភាពខុសគ្នាពីប្រទេស Colombia តែស្ថិតក្នុងគោលដៅថែរក្សាបេតិកភណ្ឌមនុស្សជាតិតែមួយ ហើយកញ្ញានឹងយកបទពិសោធន៍ដ៏ល្អនេះទៅចែករំលែកនៅប្រទេសរបស់ខ្លួនលើវិស័យបេតិកភណ្ឌ។

លោក ជុំ សៀកហ៊ យុវជនស្ម័គ្រចិត្តមកពីមន្រ្តីនាយកដ្ឋានអភិវឌ្ឍន៍ទេសចរណ៍នៃអាជ្ញាធរជាតិព្រះវិហារ បានឱ្យដឹងថាតាមរយៈវគ្គបណ្តុះបណ្តាលនេះក្រុមយុវជនបានទៅស្វែងយល់តាមការដ្ឋាននានាក្នុងរមណីយដ្ឋានអង្គរ ហើយទីតាំងនីមួយៗខុសប្លែកគ្នា តួយ៉ាងការជួសជុលប្រាសាទឥដ្ឋ ជួសជុលថ្ម ការគ្រប់គ្រងប្រព័ន្ធធារាសាស្រ្ត ការអភិរក្សកុលាលភាជន៍ និងសហគមន៍ជាដើម។ លោកបន្តថា វគ្គបណ្តុះបណ្តាលបានផ្តល់នូវចំណេះដឹងជាច្រើន ជាពិសេសអំពីវិធីសាស្រ្តជួសជុលដែលមានលក្ខណៈស្មុគ្រស្មាញដែលកន្លងលោកមិនធ្លាប់ដឹង ហើយសកម្មភាពទាំងនោះកាន់តែជំរុញទឹកចិត្តយុវជនឱ្យស្រលាញ់មរតកដូនតាថែមទៀត។ លោកបន្ថែមទៀតថា នឹងយកចំណេះដឹងទាំងនោះទៅប្រើជាប្រយោជន៍នៅស្ថាប័នរបស់លោក និងសូមឱ្យមានកម្មវិធីនេះជាបន្តបន្ទាប់ដើម្បីបង្កើនទំនាក់ទំនងរវាងយុវជន និងយុវជនជាលក្ខណៈសកល។

ឯកឧត្តម សុខ សង្វារ អគ្គនាយករង តំណាងដ៏ខ្ពង់ខ្ពស់ឯកឧត្តម ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍ថ្លែងអំណរគុណដល់ក្រុមការងារ ថ្នាក់ដឹកនាំ សាស្រ្តាចារ្យ ព្រមទាំងអ្នកជំនាញដែលបានចូលរួមជាផ្នែកមួយសម្រាប់កម្មវិធីនេះឱ្យបានដំណើរការរលូនក្នុងគោលបំណងថែរក្សា ការពារសម្បត្តិបេតិកភណ្ឌ និងការចង់ចេះចង់របស់យុវជនដឹងអំពីការងាររៀបចំតំបន់បេតិកភណ្ឌពិភពលោកដែលស្ថិតក្រោមសមត្ថកិច្ចនៃអាជ្ញាធរជាតិអប្សរា។

ឯកឧត្តមជឿជាក់ថា ពេលមនុស្សស្គាល់អ្វីមួយច្បាស់ គេនឹងចាប់ផ្ដើមស្រលាញ់ និងគោរព ពេលនោះគេនឹងមានចិត្តចង់ការពារឱ្យគង់វង្សយូរអង្វែង និងចែករំលែកដល់អ្នកដទៃឱ្យបានយល់ដែរ។ ហេតុដូច្នេះបានជាមានការរៀបចំកម្មវិធីនេះដើម្បីឱ្យយុវជនបានយល់ពីតំម្លៃអង្គរ និងរឿងរ៉ាវនានាដែលនៅពីក្រោយភាពដ៏អស្ចារ្យនេះ។ ជាគំនិតស្នូល មិនសម្រាប់តែអង្គរប៉ុណ្ណោះទេ គឺសម្រាប់តំបន់បេតិកភណ្ឌនៅជុំវិញពិភពលោក ដែលយើងគ្រប់គ្នាគួរតែស្វែងយល់។ ឯកឧត្តមក៏បានសំណូមពរឲ្យយុវជនទាំងនោះ ពេលត្រលប់ទៅវិញ នឹងចែករំលែកបទពិសោធន៍ និងចំណេះដឹងពីទីនេះ ទៅកាន់គ្រួសារ មិត្តភក្តិ និងសហគមន៍របស់ពួកគេ។

សូមបញ្ចាក់ដែរថា កម្មវិធីយុវជនស្ម័គ្រចិត្តដើម្បីបេតិកភណ្ឌពិភពលោកនៅអង្គរ មានរយៈពេល១៣ថ្ងៃ ថ្ងៃទី៧-១៩ ខែសីហា ឆ្នាំ២០១៩ តាមរយៈកិច្ចសហការរវាងអង្គការយូណេស្កូ អាជ្ញាធរជាតិអប្សរា សហភាពសហព័ន្ធយុវជនកម្ពុជា និងវិទ្យាស្ថានកូរ៉េ-អង្គរដើម្បីបេតិកភណ្ឌ ដើម្បីចែករំលែកនូវបទពិសោធន៍ក្នុងការងារអភិរក្ស និងគ្រប់គ្រងតំបន់បេតិកភណ្ឌពិភពលោកអង្គរ តាមរយៈអ្នកជំនាញអាជ្ញាធរជាតិអប្សរាទៅដល់យុវជនជំនាន់ក្រោយ៕


















អត្ថបទ៖ លោក យីសុថា រូបភាព៖ លោក ហ៊ុំ រិទ្ធី
ក្នុងឱកាសអញ្ជើញបំពញភារកិច្ចនៅតាមបណ្តាខេត្ត នៅថ្ងៃទី២៦ ខែកក្កដា ឆ្នាំ២០២០ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា អមដំណើរដោយថ្នាក់ដឹកនាំអាជ្ញាធរជាតិអប្សរានិងអ្នកជំនាញឧបករណ៍ភ្លេងបុរាណលើចម្លាក់ប្រាសាទ បានអញ្ជើញពិនិត្យរូបចម្លាក់ដែលបង្ហាញពីឧបករណ៍ភ្លេងបុរាណនានានៅតាមប្រាសាទមួយចំនួន៕
១៖ អាជ្ញាធរជាតិអប្សរាបន្តកិច្ចប្រជុំពិភាក្សា លើពង្រាងផែនការមេវិស័យទេសចរណ៍ខេត្តសៀមរាបឆ្នាំ២០២០-២០៣៥
នាថ្ងៃទី១៧ ខែកក្កដា ឆ្នាំ២០២០ ឯកឧត្តម ស៊ុំ ម៉ាប់ រដ្ឋលេខាធិកាក្រសួងវប្បធម៌និងវិចិត្រសិល្បៈ តំណាងលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា រួមនឹងថ្នាក់ដឹកនាំអាជ្ញាធរជាតិអប្សរា បានបន្តពិភាក្សាលើពង្រាងផែនការមេវិស័យទេសចរណ៍នៅក្នុងខេត្តសៀមរាបនិងរមណីយដ្ឋានអង្គរ។
អង្គប្រជុំនៅថ្ងៃនេះ បានសង្កត់ធ្ងន់លើការកែតម្រូវចំណុចខ្វះខាត ការដកចេញចំណុចប៉ះពាល់ ការរកដំណោះស្រាយបញ្ហាផ្សេងៗ ការពិចារណានូវចំណុចមួយចំនួនតាមរយៈការទទួលបានពីកិច្ចពិភាក្សាក្នុងកិច្ចប្រជុំផ្ទៃក្នុងនិងអន្តរក្រសួងនាកិច្ចប្រជុំមុនៗ សម្រាប់តៀមយកទៅបង្ហាញក្នុងកិច្ចប្រជុំនាពេលខាងមុខ
តាំងនាមថ្នាក់ដឹកនាំ មន្ត្រី បុគ្គលិក គ្រប់លំដាប់ថ្នាក់នៃអាជ្ញាធរជាតិអប្សរា និងតាំងនាមខ្លួនខ្ញុំផ្ទាល់ យើងខ្ញុំសូមសំដែងនូវការអបអរសាទរដ៏ឧត្ដុង្គឧត្តម និងកោតសរសើរយ៉ាងជ្រាលជ្រៅបំផុតក្នុងឱកាសដែលលោកជំទាវរដ្ឋមន្ត្រី ត្រូវបានព្រះមហាក្សត្រនៃព្រះរាជាណាចក្រកម្ពុជា ត្រាស់បង្គាប់ផ្តល់គោរមងារកិត្តិយសនៃរាជបណ្ឌិត្យសភាកម្ពុជាជូនលោកជំទាវជា «បណ្ឌិតសភាចារ្យ»
តាមរបាយការណ៍របស់នាយកដ្ឋានរៀបចំដែនដីនិងគ្រប់គ្រងលំនៅដ្ឋានក្នុងឧទ្យានអង្គរនៃអាជ្ញាធរជាតិអប្សរា ឱ្យដឹងថា នៅសប្តាហ៍ទី២ ខែកក្តដា ឆ្នាំ២០២០នេះ ក្រុមការងារនៃនាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរប្រចាំច្រកទាំង០៦របស់អាជ្ញាធរជាតិអប្សរាបានទទួលពាក្យស្នើសុំសាងសង់លំនៅដ្ឋាន និងជួសជុលតូចតាចចំនួន៤៩ករណី។
ក្រុមការងារសហគមន៍តែងចុះជាប់ជាប្រចាំ ដើម្បីសម្របសម្រួលលើករណីសំណើផ្សេងៗនិងជួយណែនាំផ្សព្វផ្សាយអប់រំប្រជាពលរដ្ឋឱ្យយល់កាន់តែច្បាស់ពីតួនាទីអាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរ។

Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
6
Today
:
4393
Yesterday
:
5500
This Week
:
04393
This Month
:
0231257
Total
:
012056888