ព័ត៌មានថ្មីៗ

យុវជនស្ម័គ្រចិត្តបេតិកភណ្ឌពិភពលោក-យូណេស្កូ ២០១៩ ចំនួន៨ប្រទេសចុះកម្មសិក្សាស្វែងយល់អំពីកិច្ចការអភិរក្សនិងគ្រប់គ្រងតំបន់អង្គរ

បានផ្សាយនៅ ថ្ងៃទី 09 ខែ សីហា ឆ្នាំ2019 09:15 AM ដោយ ៖ អាជ្ញាធរជាតិអប្សរា

សម្រាប់ឆ្នាំ២០១៩ គឺជាលើកទី៣ហើយនៃកម្មវិធីយុវជនស្ម័គ្រចិត្តបេតិកភណ្ឌពិភពលោក-យូណេស្កូ នៅរមណីយដ្ឋានអង្គរ ដែលមានយុវជនចូលរួម១៨នាក់ មកពី៨ប្រទេស គឺកម្ពុជា កូរ៉េ បារាំង អូស្ត្រាលី កូឡុំប៊ី ប៊ុលហ្ការី ឥណ្ឌា និងចិន។ កម្មវិធីនេះមានរយៈពេល១៣ថ្ងៃ គឺចាប់ពីថ្ងៃទី៧ ដល់ថ្ងៃទី ១៩ ខែសីហា ឆ្នាំ២០១៩ ដើម្បីសិក្សានិងទទួលបទពិសោធន៍អំពីការងារអភិរក្សនិងគ្រប់គ្រងតំបន់បេតិកភណ្ឌពិភពលោកអង្គរពីអ្នកជំនាញអាជ្ញាធរជាតិអប្សរា។

ពិធីនេះបានបើកជាផ្លូវការនៅព្រឹកថ្ងៃទី៨ ខែសីហា ក្រោមវត្តមានឯកឧត្តម សុខ សង្វារ អគ្គនាយករងទទួលបន្ទុកនាយកដ្ឋានគ្រប់គ្រងទេសចរណ៍អង្គរ តំណាងឯកឧត្តម ហង់ ពៅ អគ្គនាយកអាជ្ញាធរជាតិអប្សរា លោក ម៉ី កុសល តំណាងអង្គការយូណេស្កូប្រចាំកម្ពុជា ឯកឧត្តម សំកុល សុចិត្រា អនុប្រធានសហភាពសហព័ន្ធយុវជនកម្ពុជាប្រចាំខេត្តសៀមរាប និងអ្នកស្រី Boram SHIN នាយកវិទ្យាស្ថានកូរ៉េ-អង្គរ ដើម្បីបេតិកភណ្ឌ (KACHI)។

មានមតិទៅកាន់កម្មវិធី អ្នកស្រី Boram SHIN បានឱ្យដឹងថា កម្មវិធីយុវជនស្ម័គ្រចិត្តដើម្បីបេតិកភណ្ឌយូណេស្កូឆ្នាំ២០១៩ បានរៀបចំឡើងដោយកិច្ចសហការរវាងអង្គការយូណេស្កូ អាជ្ញាធរជាតិអប្សរា សហភាពសហព័ន្ធយុវជនកម្ពុជា និងវិទ្យាស្ថានកូរ៉េ-អង្គរដើម្បីបេតិកភណ្ឌ។ កម្មវិធីនេះធ្វើឡើងក្នុងបំណងបង្កើនការយល់ដឹងនិងពង្រឹងការចូលរួមរបស់យុវជននៅថ្នាក់មូលដ្ឋាននិងពិភពលោកទាក់ទងនឹងការការពារបេតិកភណ្ឌវប្បធម៌និងបេតិកភណ្ឌធម្មជាតិ។

អ្នកស្រីបន្តទៀតថា សម្រាប់យុទ្ធនាការអ្នកស្ម័គ្រចិត្តបេតិកភណ្ឌពិភពលោកឆ្នាំ២០១៩ មានគម្រោងចំនួន៦៨ទាក់ទងនឹងបេតិកភណ្ឌចំនួន៦២ ក្នុងប្រទេសចំនួន៣៦ ហើយមានអង្គភាពយុវជនស្ម័គ្រចិត្តចំនួន៥៥ អាយុចន្លោះពី១៨ទៅ៣០ឆ្នាំ ដែលបានប្តេជ្ញាអនុវត្តសកម្មភាពឆ្ពោះទៅកាន់គោលដៅរួមនៃការអភិរក្សនិងផ្សព្វផ្សាយ។ អ្នកស្រីក៏បានសម្តែងការអរគុណដល់អាជ្ញាធរជាតិអប្សរា ស.ស.យ.ក.ខេត្តសៀមរាប និងអង្គការយូណេស្កូដែលគាំទ្រគម្រោងយុវជនស្ម័គ្រចិត្តបេតិកភណ្ឌពិភពលោកលើកទី៣ឱ្យដំណើរការបានយ៉ាងរលូន ហើយសង្ឃឹមថារយៈពេល២សប្តាហ៍នេះ នឹងធ្វើឱ្យសិក្ខាកាមទាំង១៧នាក់ទទួលបានបទពិសោធន៍និងការចងចាំដ៏ល្អពីអង្គរ។

ជួសមុខឱ្យថ្នាក់ដឹកនាំអាជ្ញាធរជាតិអប្សរា ឯកឧត្តម សុខ សង្វារ ក៏បានលើកឡើងពីគុណតម្លៃដ៏អស្ចារ្យនៃអង្គរ ដែលជាបុរាណដ្ឋានដ៏ធំមួយនៅក្នុងចំណោមបុរាណដ្ឋានល្បីៗលើពិភពលោក។ អង្គរ មានគម្រោងស្រាវជ្រាវជាច្រើនទាក់ទងនឹងសំណង់ស្ថាបត្យកម្ម ប្រវត្តិសាស្ត្រ និងរបកគំហើញផ្សេងៗដែលបានបកសា្រយតាមបែបវិទ្យាសាស្ត្រគួរឱ្យកត់សម្គាល់។ ក្រៅពីនេះ អង្គរគឺជាដួងព្រលឹងនៃជនជាតិខ្មែរ ដែលសម្បូរទៅដោយមរតកវប្បធម៌រូបីនិងអរូបីជាច្រើន ហើយនៅតែមានការគោរពប្រតិបត្តិរហូតដល់សព្វថ្ងៃនិងបណ្តុះគំនិតនៃការគោរព ថែរក្សាអង្គររបស់ប្រជាជនក្នុងនោះជាស្រេច។

តាមរយៈការងារស្ម័គ្រចិត្តលើការងារបេតិភណ្ឌផ្ទាល់ ការចុះជួបសហគមន៍ និងស្តាប់បទបង្ហាញពីអ្នកជំនាញអាជ្ញាធរជាតិអប្សរាលើផ្នែកផ្សេងៗ ឯកឧត្តមជឿជាក់ថា យុវជននឹងមានការយល់ដឹងកាន់តែច្បាស់អំពីបេតិកភណ្ឌ ស្រឡាញ់បេតិកភណ្ឌ គោរពបេតិកភណ្ឌ ហើយនឹងចូលរួមថែរក្សាបេតិកភណ្ឌគ្រប់ៗគ្នា។ ជាពិសេស សកម្មភាពនេះក៏នឹងបង្ហាញភាពជាគំរូដល់យុវជន និងសាធារណជនដទៃទៀត ឱ្យបណ្តុះស្មារតីគោរពស្រឡាញ់ និងចូលរួមការពារបេតិកភណ្ឌទាំងអស់គ្នា៕




















អត្ថបទ៖ កញ្ញា ហ៊ីង ស្រីរ័ត្ន          រូបភាព៖ លោក ហាប់ គឹមអាន
អាជ្ញាធរជាតិអប្សរាដើរតួនាទីយ៉ាងសំខាន់ក្នុងការគ្រប់គ្រងថែរក្សារមណីយដ្ឋានអង្គរ។ ភារកិច្ចជាច្រើនដែលអាជ្ញាធរជាតិអប្សរាបាននិងកំពុងអនុវត្តទាំងលើកិច្ចការអភិរក្ស និងអភិវឌ្ឍន៍រមណីយដ្ឋានអង្គរប្រកបដោយចីរភាព។ រាល់សកម្មភាពអភិរក្ស និងអភិវឌ្ឍន៍ទាំងឡាយចាំបាច់ត្រូវបានផ្សព្វផ្សាយព័ត៌មានក្នុងទម្រង់ជារូបភាព និងជាវីដេអូអំពីសមិទ្ធិផល និងសកម្មភាពការងាររបស់អាជ្ញាធរជាតិអប្សរាឱ្យបានទូលំទូលាយទៅកាន់សាធារណៈជនទូទៅ។
យោងតាមរបាយការណ៍ក្រុមការងារលេខាធិការដ្ឋានសហគមន៍នៃអាជ្ញាធរជាតិអប្សរាក្នុងខែកក្កដាឆ្នាំ២០១៩នេះ ក្រុមការងារបានបន្តការងារចុះពិនិត្យអនុញ្ញាតការជួសជុលសំណង់តូចតាច ដែលស្ថិតនៅក្នុងតំបន់រមណីយដ្ឋានអង្គរបានចំនួន១០១ករណី។
នារយៈពេល៧ខែដើមឆ្នាំ២០១៩ គឺចាប់ពីថ្ងៃទី១មករា ដល់ថ្ងៃទី២៥ កក្កដា អាជ្ញាធរជាតិអប្សរាបានដាំកូនឈើក្នុងរមណីយដ្ឋានអង្គរបានចំនួន ១៩,៥៤១ដើម ដែលក្នុងនោះរួមមាន ឈើទាល គគីរ គ្រញូង បេង ធ្នង់ ច្រេស នាងនួន កកោះ ផ្តៀក ត្រយឹង ចំបក់ ធ្លក ពពេល បង្កូវ ត្រាច ស្រទ្បៅ អង្កាញ់ ធេ្មញត្រី គុយ រំដួល ផ្កាជើងគោ អំពិលបារាំង ត្របែកព្រៃ និងអង្គារបុស្ស។
ក្នុងឱកាសដ៏មហាជ័យមង្គលចម្រើនជន្មាយុគម្រប់ ៦៧ឆ្នាំ ឈានចូល ៦៨ឆ្នាំ របស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី០៥ ខែសីហា ឆ្នាំ២០១៩ យើងខ្ញុំទាំងអស់គ្នាជាថ្នាក់ដឹកនាំ មន្ត្រីរាជការ បុគ្គលិក និងពលករទាំងអស់របស់អាជ្ញាធរជាតិអប្សរា សូមគោរពជូនពរបវរមហាប្រសើរជូន សម្ដេចតេជោ នាយករដ្ឋមន្ត្រី សូមប្រកបដោយកម្លាំងមាំមួន សុខភាពល្អបរិបូណ៌ បញ្ញាញាណវាងវៃ និងអាយុយឺនយូរ ដើម្បីដឹកនាំរាជរដ្ឋាភិបាលកម្ពុជា និងប្រទេសជាតិទទួលបានជោគជ័យថ្មីៗថែមទៀត ជាពិសេសវឌ្ឍនភាព និងកិត្យានុភាពលើសកលលោក។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
6
ថ្ងៃនេះ
:
1872
ម្សិលមិញ
:
2464
សប្តាហ៍នេះ
:
04336
ខែនេះ
:
0071945
សរុប
:
008916088