ព័ត៌មានថ្មីៗ

ទំនៀមបណ្តែតប្រទីបវត្តអារញ្ញសាគរ មានសារសំខាន់យ៉ាងណា?

បានផ្សាយនៅ ថ្ងៃទី 20 ខែ តុលា ឆ្នាំ2016 09:28 AM ដោយ ៖ អាជ្ញាធរជាតិអប្សរា

ក្រោយពិធីចេញវស្សាមួយថ្ងៃ គឺចំថ្ងៃ១រោចខែអស្សុជ វត្តអារញ្ញសាគរដែលស្ថិតនៅតាមខាងកើតស្ទឹងសៀមរាប និងជាវត្តចុងក្រោយបង្អស់តាមបណ្តោយស្ទឹងសៀមរាបមុននឹងដល់បឹងទន្លេសាប តែងប្រារព្ធពិធីបុណ្យដ៏អឹកធឹកមួយជារៀងរាល់ឆ្នាំមិនដែលខាន នោះគឺ ពិធីបុណ្យបណ្តែតប្រទីប។ ពិធីបុណ្យនេះទទួលបានការចាប់អារម្មណ៍យ៉ាងខ្លាំងពីសំណាក់អ្នកចូលរួម ជាពិសេសគឺយុវជន។

ជាទំនៀមមួយដែលរក្សាទុកតាំងពីបរមបុរាណមក ខណៈដែលបណ្តាវត្តផ្សេងៗទៀតដែលនៅតាមបណ្តោយស្ទឹងសៀមរាបដូចគ្នា មិនបានរៀបចំឡើយ។ ពិធីបណ្តែតប្រទីបក្រោយចេញវស្សាភ្លាមៗ ហាក់បង្ហាញអំពីអត្តសញ្ញាណមួយដែលធ្វើឲ្យវត្តអារញ្ញសាគរមានលក្ខណៈពិសេសប្លែកពីវត្តដទៃទៀត។ ប្លែកត្រង់ថា បណ្តាវត្តមួយចំនួនដែលនៅតាមបណ្តោយស្ទឹងសៀមរាបដែរ នឹងរៀបចំប្រទីបបណ្តែតនៅថ្ងៃទី១៥កើតខែកត្តិក ដំណាលគ្នានឹងព្រះរាជពិធីបុណ្យអុំទូក អកអំបុក និងបណ្តែតប្រទីបដែលធ្វើឡើងនៅទីរាជធានីភ្នំពេញដែរ។

កូនប្រទីបរាប់ពាន់រចនាដោយផ្កាឈូក ទៀនធូប ដាក់លក់នៅតាមផ្លូវ ហែហមប្រទីបធំដែលរៀបចំដោយព្រះសង្ឃ និងពុទ្ធបរិស័ទចំណុះជើងវត្តអារញ្ញសាគរ។ នៅម៉ោង៨យប់ ប្រទីបធំដែលរៀបចំជាក្បូរក្បាច់រចនាកំពូលប្រាសាទ តាក់តែងដោយភ្លើងអគ្គិសនីភ្លឺព្រោងព្រាត ត្រូវបានដង្ហែចេញពីវត្តឆ្ពោះទៅតម្កល់ទុកមួយយប់ នៅសាលាឆទានយាយអេង ដែលជាគោលដៅត្រូវបណ្តែតប្រទីប។ យប់ថ្ងៃ២រោចខែអស្សុជ ទើបពិធីបណ្តែតប្រទីបបានចាប់ផ្តើមឡើងព្រោងព្រាតលើស្ទឹងសៀមរាប។

តាមសេចក្តីពន្យល់របស់លោកតាអាចារ្យ ទៅកាន់អ្នកចូលរួមក្នុងពិធីនេះបានរៀបរាប់ថា ពិធីបណ្តែតប្រទីបធ្វើឡើងដើម្បីភាពត្រជាក់ត្រជុំ អរគុណដល់ព្រះគង្គា ដែលបានផ្តល់ទឹកស្រោចស្រពស្រូវស្រែដំណាំ។ ជាមួយគ្នានឹងពិធីបណ្តែតប្រទីប លោកតាអាចារ្យក៏ប្រកាសសុំសេចក្តីសុខសប្បាយត្រជាក់ត្រជុំដល់កូនចៅ សុំឲ្យធ្វើស្រែចម្ការកើតទទួលបានផលដំណាំល្អជារៀងរាល់ឆ្នាំ។ ក្រឡេកមើលអ្នកបណ្តែតប្រទីបវិញ មិនត្រឹមតែអរគុណដល់ព្រះគង្គាទេ អ្នកខ្លះបានលើកប្រទីបបួងសួងសុំសុខចម្រើន និងប្រាថ្នាសុំពរផ្សេងៗមុននឹងបណ្តែតប្រទីបចេញទៅ។

អ្នកស្រាវជ្រាវ និងជាអនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរនៃអាជ្ញាធរជាតិអប្សរា លោក អ៊ឹម សុខរិទ្ធី អះអាងថា ពិធីបណ្តែតប្រទីបនេះត្រូវបានអ្នកស្រាវជ្រាវជាច្រើនយល់ថា ជាពិធីពាក់ព័ន្ធនឹងធម្មជាតិនៃការងារកសិកម្ម។ “មុននឹងយល់រឿងនេះ យើងត្រូវគិតត្រឡប់ថយក្រោយបន្តិច ពោលគឺពេលដែលប្រទេសយើងមិនទាន់ទទួលឥទ្ធិពលសាសនាប្រទេសឥណ្ឌា។ បណ្តាប្រទេសនៅអាស៊ីអាគ្នេយ៍ ដែលទទួលឥទ្ធិពលខ្យល់មូសុង មានទម្លាប់ស្រដៀងៗគ្នាទៅតាមរដូវកាល ដែលពាក់ព័ន្ធនឹងឥទ្ធិពលរបស់ធម្មជាតិមកលើមនុស្ស។ ដើម្បីឈ្នះធម្មជាតិ មនុស្សបានរៀបចំកិច្ចគ្រប់បែបយ៉ាង ឲ្យខ្លួនធ្វើម្ចាស់លើធម្មជាតិនិងបានផលពីធម្មជាតិ។ មនុស្សព្យាយាមផ្តាច់ខ្លួនពីធម្មជាតិ ប៉ុន្តែក៏ត្រូវការធម្មជាតិជានិច្ចកាលដែរ។ ក្រោយទទួលភោគផលពីធម្មជាតិហើយ ក៏តែងធ្វើពិធីផ្សេងៗដើម្បីតបស្នងទៅធម្មជាតិវិញ”។

លោកពន្យល់បន្ថែមថា “ការដែលយកពិធីនេះទៅបកស្រាយថាពាក់ព័ន្ធពិធីសាសនា ឬប្រវត្តិសាស្ត្រជាដើមនោះ គឺគ្រាន់តែជាហេតុផលក្រោយៗមកទៀត បន្ទាប់ពីប្រទេសយើងបានទទួលឥទ្ធិពលសាសនាពីឥណ្ឌាមកហើយ ដើម្បីឲ្យស្របនឹងគំនិតរបស់សាសនាពីឥណ្ឌាមកផង ដើម្បីឲ្យកុំឲ្យបាត់ទំនៀមដែលធ្លាប់ធ្វើមកជាយូរហើយផង ប៉ុន្តែយើងមានមូលដ្ឋាននៃជំនឿរបស់យើងតាំងពីមុនមកហើយ នោះគឺការជំនះទៅនឹងធម្មជាតិហ្នឹងឯង”។

តើការជំនះនឹងធម្មជាតិនោះជាអ្វី ដែលទាក់ទងនឹងពិធីនេះ? លោក អ៊ឹម សុខរិទ្ធី បញ្ជាក់ថា “ជាកិច្ចដែលមនុស្សព្យាយាមរំដោះដី ឲ្យផុតពីទឹកដែលជន់លិចដីប៉ុន្មានខែកន្លងមកក្នុងរដូវវស្សា ដើម្បីបានដីត្រទ្បប់មកធ្វើស្រែចម្ការវិញ។ ប្រទីប ជាគ្រឿងបំភ្លឺ កំចាត់ភាពងងឹតនៃរដូវភ្លៀង។ គេបណ្តែតប្រទីបបណ្តែតនៅពេលរាត្រីក្នុងនិងបណ្តោយទឹកហូរ ប្រៀបនឹងការបណ្តេញទឹកចេញ និងទទួលបានមកវិញនូវពន្លឺព្រះអាទិត្យ ដែលតែងតែបាំងបាត់ដោយពពកបង្កនាំភ្លៀងមកមិនឈប់ឈរ។ រីឯពេលថ្ងៃ គេអុំទូកតាមបណ្តោយទឹកហូរ ក៏ជាកិច្ចដែលមនុស្សរៀបចំបណ្តេញទឹកឲ្យហូរចេញពីដីដែរ”។ ក្នុងន័យនេះ លោក អ៊ឹម សុខរិទ្ធី យល់ថា ពិធីបណ្តែតប្រទីប អកអំបុក និងសំពះព្រះខែ បើទោះជាមានឈ្មោះផ្សេងគ្នាក៏ដោយ តែខ្លឹមសារនិងវត្ថុបំណងតែមួយទេ ពោលគឺជាពិធីដែលពាក់ព័ន្ធនឹងការងារកសិកម្មសុទ្ធសាធ។

ពាក់ព័ន្ធនឹងពេលវេលាដែលប្រារព្ធពិធីនេះវិញ អ្នកស្រាវជ្រាវរូបនេះមើលឃើញថា ដើម្បីឲ្យពិធីរបៀបនេះមានអត្ថន័យស្របនឹងទំនៀមទម្លាប់ដែលមានពីដើមនោះ វត្តអារញ្ញសាគរបានធ្វើទៅតាមពេលវេលាពិតប្រាកដ និងត្រឹមត្រូវតាមរដូវកាល ជាក់ស្តែងដែលជាទំនៀមរបស់អ្នកសៀមរាបតាំងពីដើមមក គឺគេរៀបចំពិធីនេះនៅក្រោយពិធីភ្ជុំបិណ្ឌ ឬចេញវស្សាភ្លាម។ រីឯការរៀបចំ ១៥កើតខែកត្តិក លោកយល់ថា ជាទំនៀមរបស់ព្រះមហាក្សត្រ ដែលរៀបចំឡើងនៅរាជធានី ជាព្រះរាជពិធីប្រចាំឆ្នាំ៕
















































ពិព័រណ៍ការងារដើម្បីតម្រង់ទិសក្នុងការសិក្សារបស់ប្អូនៗសិស្សានុសិស្ស ត្រូវបានរៀបចំឡើង ដោយអង្គការថែរក្សាដើម្បីកម្ពុជា Caring for Cambodia(CFC) និងវិទ្យាល័យផ្សេងៗ ព្រមទាំងមានការចូលរួមពីបណ្តាស្ថាប័នជាច្រើន។ ពិព័រណ៍បានរៀបចំនៅវិទ្យាល័យបាគង នាព្រឹកថ្ងៃទី២៧ ខែឧសភា ឆ្នាំ២០១៦។ អាជ្ញាធរជាតិអប្សរាក៏បានចូលរួមចំពោះការផ្សព្វផ្សាយនេះ ដោយមានមន្ត្រីជំនាញជាអ្នកពន្យល់ដោយផ្ទាល់ លើការងារគ្រប់គ្រង អភិរក្ស និងអភិវឌ្ឍន៍ប្រកបដោយចីរភាពចំពោះរមណីយដ្ឋានអង្គរ ដែលជាបេតិកភណ្ឌពិភពលោក។
ក្រៅពីការយកចិត្តទុកដាក់លើការងារអភិរក្ស និងអភិវឌ្ឍន៍ប្រកបដោយចីរភាពក្នុងតំបន់រមណីយដ្ឋានអង្គរ ក្នុងនោះក៏បានយកចិត្តទុកដាក់ជាប្រចាំចំពោះសុខទុក្ខបងប្អូនប្រជាពលរដ្ឋដែលរស់នៅក្នុងតំបន់រមណីយដ្ឋាននោះផងដែរ។ ជាក់ស្តែងក្រុមការងារសហគមន៍នៃអាជ្ញាធរជាតិអប្សរាប្រចាំស្រុកបន្ទាយស្រី នៅព្រឹកថ្ងៃទី២៧ខែឧសភាឆ្នាំ២០១៦នេះ  បាននាំយកនូវសម្ភារៈ  និងគ្រឿងបរិភោគមួយចំនួន  ដែលជាអំណោយដ៏ថ្លៃថ្លារបស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា និងលោកជំទាវ ទៅចែកជូនគ្រួសារដែលរងគ្រោះដោយអគ្គិភ័យ ភ្លើងឆេះផ្ទះស្ថិតនៅក្នុងភូមិតាឯក ឃុំរុនតាឯក ស្រុកបន្ទាយស្រី ខេត្តសៀមរាប។
ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានបំពេញព្រះរាជបេសកកម្មប្រកបដោយភាពជោគជ័យលើទឹកដីនៃអតីតរាជធានីនៃអាណាចក្រខ្មែរ។ កាលពីថ្ងៃទី២៤ ខែឧសភា ឆ្នាំ២០១៦កន្លងទៅនេះ នាព្រះលានជល់ដំរីនៃទីក្រុងអង្គរធំដែលជាអតីតរាជធានីដ៏ឧត្តុង្គឧត្តមនាកំឡុងសតវត្សទី៩ដល់ទី១៥ បច្ចុប្បន្នស្ថិតក្នុងរមណីយដ្ឋានអង្គរ ព្រះអង្គបានយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីច្រត់ព្រះនង្គ័ល។ ព្រះរាជបេសកកម្មបន្ទាប់គឺ ព្រះអង្គទ្រង់យាងទៅបំពេញព្រះរាជទស្សនកិច្ចនៅតំបន់ប្រាសាទកោះកេរដែលក៏ជាអតីតរាជធានីក្នុងកំឡុងដើមសតវត្សទី១០ បច្ចុប្បន្នស្ថិតក្នុងខេត្តព្រះវិហារ ដើម្បីបួងសួងដល់ព្រះវិញ្ញាណក្ខន្ធអតីតព្រះមហាក្សត្រខ្មែរគ្រប់ជំនាន់ ដើម្បីប្រទានក្តីសុខដល់ប្រជានុរាស្ត្រទូទាំងនគរនៃព្រះរាជាណាចក្រកម្ពុជា។
ព្រះរាជពិធីច្រត់ព្រះនង្គ័លឆ្នាំនេះ ត្រូវបានរៀបចំឡើងនៅលើទឹកដីសៀមរាបអង្គរ នៅមុខព្រះលានជល់ដំរី នាព្រឹកថ្ងៃទី២៤ ខែឧសភា ឆ្នាំ២០១៦ ត្រូវនឹងថ្ងៃ៤រោច ខែពិសាខ ពុទ្ធសករាជ ២៥៦០ ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំ និងប្រជាពលរដ្ឋយ៉ាងច្រើនកុះករ។
ដើម្បីអបអរសាទរព្រះរាជពិធីច្រត់ព្រះនង្គ័ល ដែលប្រារព្ធឡើងនៅក្នុងបរិវេណមុខព្រះលានជល់ដំរី ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានោះ អាជ្ញាធរជាតិអប្សរានឹងចែកទឹកជូនបងប្អូនប្រជាពលរដ្ឋ និងភ្ញៀវទេសចរទាំងអស់ ដែលមកទស្សនាកម្មវិធីរយៈពេល៤ថ្ងៃដោយមិនគិតថ្លៃ គឺចាប់ពីថ្ងៃទី២៣រហូតដល់ថ្ងៃទី២៦ ខែឧសភា ឆ្នាំ២០១៦។ ទីតាំងចែកចាយទឹកមានពីរកន្លែងស្ថិតនៅផ្នែកខាងជើង និងខាងត្បូងនៃព្រះលានជល់ដំរី ដែលជាទីតាំងប្រារព្ធពិធី។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
6
ថ្ងៃនេះ
:
7483
ម្សិលមិញ
:
17743
សប្តាហ៍នេះ
:
61375
ខែនេះ
:
0209483
សរុប
:
010890136