NEWS

APSARA Authority finishes restoration of 45 meters wall in the northern gate of Angkor Thom

Published on 20 September 2016 12:44 PM Post By ៖ Apsara National Authority

កំពែងក្រុងអង្គរធំជ្រុងខាងជើង ផ្នែកខាងកើតខ្លោងទ្វារដីឆ្នាំងប្រវែង៤៥ម៉ែត្រ ដែលរងការខូចខាតដោយឥទ្ធិពលខ្យល់ព្យុះកេតសាណានាឆ្នាំ២០១១កន្លងមក បានជួសជុលរួចជាស្ថាពរហើយនៅខែកញ្ញា ឆ្នាំ២០១៦នេះ ដោយនាយកដ្ឋានអភិរក្សប្រាសាទក្នុងឧទ្យាននិងបុរាណវិទ្យាបង្ការនៃអាជ្ញាធរជាតិអប្សរា បន្ទាប់ពីបំពេញការងារអស់រយៈពេល៤ឆ្នាំ។

លោក ម៉ៅ សុខនី មន្ត្រីបច្ចេកទេសនិងជាអ្នកគ្រប់គ្រងការដ្ឋានជួសជុលរបស់នាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការនៃអាជ្ញាធរជាតិអប្សរា បានប្រាប់ថា កំពែងប្រវែង៤៥ម៉ែត្រនេះ បានរងនូវការខូចខាតដោយសារកត្តាអាយុកាលរាប់រយឆ្នាំ អាកាសធាតុ ការគំរាមកំហែងពីធម្មជាតិ ពិសេសឥទ្ធិពលនៃខ្យល់ព្យុះកេតសាណាកាលពីឆ្នាំ២០១១។ ដោយមើលឃើញពីហានិភ័យនិងភាពទ្រុឌទ្រោមនៃរចនាសម្ព័ន្ធកំពែងប្រាសាទ នៅឆ្នាំ២០១២អាជ្ញាធរជាតិអប្សរាក៏បានធ្វើការទល់ទ្រនិងថែទាំជាបន្តបន្ទាប់រហូតធ្វើការជួសជុលរួចជាស្ថាពរនៅពេលនេះ។

លោកបន្តទៀតថា ចំពោះការជួសជុលកំពែងនេះ គឺធ្វើតាមបច្ចេកទេសបុរាណនិងរក្សានូវទ្រង់ទ្រាយដើមទាំងស្រុង ដោយការរៀបថ្មតាមទីតាំងដើមចំពោះថ្មល្អ ឯថ្មណាដែលពុកផុយប្រើការមិនកើត គឺជំនួសដោយថ្មថ្មី។ ចំណែកបាយអដែលបិទភ្ជាប់ថ្មបាយក្រៀមនឹងជញ្ជាំងកំពែង គឺផ្សំឡើងដោយសមាសធាតុដូចជា ខ្សាច់ ដីឥដ្ឋ កំទេចថ្មបាយក្រៀមម៉ដ្ឋ ដែលវាមានភាពស្អិតល្អ ពេលស្ងួតគឺរឹងមាំដូចបេតុងដូច្នោះដែរ។ បន្ថែមពីនោះ លោកបានអះអាងថា ជញ្ជាំងកំពែងដែលទើបជួសជុលថ្មីនេះនឹងមានភាពរឹងមាំយូរជាងសំណង់ចាស់ ព្រោះពីបុរាណកំពែងនេះមានភាពស្តើង មុខកាត់ប្រវែងមួយម៉ែត្រ ហើយខាងក្នុងទប់ដោយដី អាចនៅបានជាង៨០០ឆ្នាំមកហើយ។ រីឯបច្ចេកទេសថ្មី គឺក្រុមការងារបានថែមជញ្ជាំងមួយជាន់ទៀតពីខាងក្នុង ដូច្នេះនឹងអាចធ្វើឱ្យជញ្ជាំងនេះមានភាពរឹងមាំកាន់តែយូរ។ ក្នុងនោះដែរ ចំពោះការរៀបថ្ម ដាប់ថ្ម ជញ្ជូនថ្ម ក៏មិនមានការប្រើគ្រឿងចក្រ អ្វីដែរ គឺប្រើកម្លាំងពលកម្មរបស់អាជ្ញាធរជាតិអប្សរាចំនួន៧០នាក់។ លោក សុខនី ក៏បានបញ្ជាក់ទៀតថា បន្ទាប់ពីបញ្ចប់គម្រោងជួសជុលនេះ ក្រុមការងារនឹងបន្តភារកិច្ចថែទាំ ទប់ទឹកកុំឱ្យហូរច្រោះមកលើជញ្ជាំងកំពែង កាត់ក្រីមែកឈើ និងដកកូនឈើដែលដុះលើកំពែង។

លោកពូ សូ នៅ អាយុ៥២ឆ្នាំ មានស្រុកកំណើតនៅភូមិស្រះស្រង់ ជាប្រធានក្រុមកម្មករបានប្រាប់ថា លោកពូចូលមកធ្វើការងារនេះរយៈពេល៤ឆ្នាំហើយ ទទួលបន្ទុកផ្នែកដាប់ថ្មនិងរៀបថ្ម។ ចំពោះការងារមិនពិបាកអ្វីទេ ព្រោះជាជំនាញស្រាប់ វាគ្រាន់តែទាមទារ ការអត់ធ្មត់ ការស្រឡាញ់ និងយកចិត្តទុកដាក់តែប៉ុណ្ណោះ។ លោកពូក៏បានសម្តែងនូវក្តីសប្បាយរីករាយដែលបានចូលរួមចំណែកក្នុងការជួសជុល អភិរក្សបេតិកភណ្ឌដូនតាជូនកូនខ្មែរគ្រប់ជំនាន់ផងដែរ ហើយក៏សូមឱ្យកូនខ្មែរទាំងអស់ចេះស្រឡាញ់ ថែរក្សា ការពារនូវសម្បត្តិទាំងនេះ ឱ្យបានគង់វង្សទុកជាមរតកដល់កូនចៅជំនាន់ក្រោយៗទៀត។

គួរបញ្ជាក់ផងដែរថា តាំងពីឆ្នាំ២០១២មកដល់ពេលនេះ អាជ្ញាធរជាតិអប្សរាបានជួសជុលកំពែងជញ្ជាំងអង្គរធំបានប្រវែងសរុប៨៣ម៉ែត្រហើយ ដូចជានៅទន្លេអុំប្រវែង១៦ម៉ែត្រ និងនៅខ្លោងទ្វារដីឆ្នាំងជ្រុងឦសានប្រវែង៨ម៉ែត្រ ចំណុចកណ្តាលប្រវែង៤៥ម៉ែត្រ និងខាងជើងឆៀងខាងកើតប្រវែង១៤ម៉ែត្រ៕







របាយការណ៍របស់លេខាធិការដ្ឋានសហគមន៍នៃអាជ្ញាធរជាតិអប្សរា សប្តាហ៍ទី១ ខែឧសភា ឆ្នាំ២០២០ បង្ហាញថា ក្រុមការងារសហគមន៍ បានចុះសម្របសម្រួលជាមួយប្រជាពលរដ្ឋដើម្បីពិនិត្យ និងដោះស្រាយសំណើស្នើសុំជួសជុលផ្ទះ រួមទាំងសាងសង់តូចតាចតាមភូមិទាំង១១២ភូមិ ក្នុងតំបន់ឧទ្យានអង្គរ ដោយអនុញ្ញាតជូនប្រជាពលរដ្ឋបានចំនួន២៩គ្រួសារ។
សួនបណ្ដុះកូនឈើមណ្ឌល៣ ជាសួនមួយក្នុងចំណោមសួនបណ្ដុះកូនឈើទាំង៤របស់អាជ្ញាធរជាតិអប្សរា។ ជារៀងរាល់ឆ្នាំ សួននេះបានដើរតួនាទីយ៉ាងសំខាន់ក្នុងការបណ្ដុះកូនឈើ សម្រាប់ការដាំដុះ និងចែកចាយដល់ប្រជាពលរដ្ឋដែលមានបំណងយកទៅដាំដុះនៅតំបន់នានាជាពិសេសនៅក្នុងតំបន់អង្គរ។ ឆ្នាំនេះ សួនបណ្ដុះកូនឈើមណ្ឌល៣ ដែលបណ្ដុះប្រភេទឈើព្រៃហូបផ្លែ និងឈើលម្អ បានត្រៀមកូនឈើប្រមាណ៣ម៉ឺនដើមសម្រាប់ការងារដាំដុះ ក៏ដូចជាការចែកចាយ។
សារលិខិតថ្វាយព្រះពរ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងឱកាសដ៏ឧត្តុង្គឧត្តមប្រពៃថ្លៃថ្លា ប្រកបដោយសេចក្ដីសោមនស្សរីករាយ នៃព្រះរាជពិធីចម្រើនព្រះជន្មវស្សាគម្រប់៦៧ យាងចូល៦៨ព្រះវស្សា ដែលនឹងប្រព្រឹត្តទៅនាថ្ងៃព្រហស្បតិ៍ ៨រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែឧសភា ឆ្នាំ២០២០
នាព្រឹកថ្ងៃទី១២ ខែឧសភា ឆ្នាំ២០២០ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានចុះត្រួតពិនិត្យការជួសជុលប្រាសាទតាអួន ដែលបានចាប់ផ្តើមដំណើរការជួសជុលកាលពីចុងខែមីនា ឆ្នាំ២០២០។
កន្លែងទទួលពាក្យចំនួន៣កន្លែងទើបនឹងបង្កើតទីតាំងបន្ថែមទៀត ទី១ នៅមជ្ឈមណ្ឌលសេវាកម្មអតីតបញ្ជរលក់បណ្ណចូលទស្សនារមណីយដ្ឋានអង្គរ ទី២ ច្រកចេញចូលតែមួយរបស់រដ្ឋបាលស្រុកអង្គរធំ និងទី៣ នៅស្រុកបន្ទាយស្រី បានដាក់ឱ្យដំណើរការហើយ ដើម្បីសម្រួលដល់ការស្នើសុំសាងសង់ផ្សេងៗរបស់ប្រជាពលរដ្ឋរស់នៅក្នុងឧទ្យានអង្គរ។

Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
8
Today
:
14673
Yesterday
:
17666
This Week
:
104885
This Month
:
0252993
Total
:
010933646