NEWS

Khmer Ceramics get very impressed by Youth Volunteers of World Heritage

Published on 18 August 2016 03:30 PM Post By ៖ Apsara National Authority

កុលាលភាជន៍ខ្មែរបុរាណ ដែលត្រូវបានយកមកថែរក្សាទុក និងកំពុងសិក្សាស្រាវជ្រាវលម្អិតនៅក្នុងអង្គភាពកុលាលភាជន៍អង្គរនៃអាជ្ញាធរជាតិអប្សរា ចាប់ផ្តើមមានការចាប់អារម្មណ៍ខ្លាំងពីសំណាក់ក្រុមអ្នកស្រាវជ្រាវ និងអ្នកស្រឡាញ់បេតិកភណ្ឌវប្បធម៌កាន់តែច្រើនឡើងៗ។ មួយរយៈចុងក្រោយនេះ គេសង្កេតឃើញថា ស្ទើរតែគ្រប់ក្រុមស្រាវជ្រាវនិងក្រុមអ្នកសិក្សាអំពីបេតិកភណ្ឌពិភពលោក ដែលបានមកដល់អង្គរច្រើនតែមិនមើលរំលងអង្គភាពដ៏សំខាន់នេះឡើយ។

ជាក់ស្តែង នៅរសៀលថ្ងៃទី១៧ ខែសីហានេះ ក្រុមយុវជនស្ម័គ្រចិត្តបេតិកភណ្ឌពិភពលោក ដែលបានបំពេញបេសកកម្មលើការងារសិក្សាស្វែងយល់បេតិកភណ្ឌអង្គររយៈពេល១២ថ្ងៃ ក៏បានចំណាយពេលមួយល្ងាច ដើម្បីចូលមកសិក្សា នៅក្នុងអង្គភាពកុលាលភាជន៍អង្គរនេះដែរ។ ក្រុមនេះបានសិក្សារៀនសូត្រអំពីរបៀបចុះបញ្ជីសារពើភ័ណ្ឌបំណែកកុលាលភាជន៍ របៀបជួសជុលបំណែកកុលាលភាជន៍ និងបានស្តាប់បទបង្ហាញអំពីសាវតារនៃការចាប់ផ្តើមបង្កើតអង្គភាពនេះឡើង។

កញ្ញា Boram SHIN ជនជាតិកូរ៉េ និងជាអ្នកដឹកនាំក្រុមយុវជនស្ម័គ្រចិត្តបេតិកភណ្ឌពិភពលោកនេះ បានបង្ហាញនូវអារម្មណ៍របស់នាងថា កញ្ញាពិតជារំភើបដែលបានឃើញបំណែកកុលាលភាជន៍នាសម័យកាលដ៏យូរលង់របស់កម្ពុជា។ កញ្ញាពេញចិត្តនឹងការងារនេះ ដោយសារកញ្ញាក៏ធ្លាប់ធ្វើការងារនេះដែរនៅក្នុងប្រទេសកូរ៉េ។ ចំណែក លោក James Bryan Davis ជនជាតិអាមេរិកក៏បានបង្ហាញក្តីរំភើបដែលបានមករៀនសូត្រពីរបៀបចុះបញ្ជីសារពើភណ្ឌ និងរបៀបជួសជុលបំណែកកុលាលភាជន៍នេះ។ លោករៀបរាប់ថា នៅអាមេរិក៏មានបំណែកកុលាលភាជន៍ដែរ តែគេច្រើនធ្វើបញ្ជីនៅកន្លែងស្រាវជ្រាវផ្ទាល់តែម្តង ឬនៅតាមមហាវិទ្យាល័យណាមួយ ហើយអ្វីដែលប្លែកគ្នាខ្លាំងបំផុតនោះគឺ បំណែកភាជន៍នៅអាមេរិកច្រើនតែមានក្បាច់លម្អច្រើនជាងនៅខ្មែរ ដោយសារតែស្ថិតនៅក្នុងសម័យកាលក្រោយៗដែលកាន់ទំនើបហើយ ជាពិសេស បច្ចេកទេស និងសម្ភារៈវិភាគមានលក្ខណៈទំនើបខ្លាំង។

កញ្ញា ញ៉ែម សុពីន និស្សិតផ្នែកទំនាក់ទំនងអន្តរជាតិនៃសាកលវិទ្យាល័យបញ្ញាសាស្ត្រកម្ពុជា ដែលបានមកចូលរួមតាមរយៈសហភាពសហព័ន្ធយុវជនកម្ពុជា បានរៀបរាប់ថា កញ្ញាពិតជារីករាយមែនទែន ដែលអាជ្ញាធរជាតិអប្សរាបានអនុញ្ញាតឲ្យក្រុមរបស់ខ្លួនបានចូលមកឃើញនូវបំណែកភាជន៍ខ្មែរដែលមានអាយុកាលរាប់ពាន់ឆ្នាំមកហើយនោះ។ “ក្នុងនាមខ្ញុំជាកូនខ្មែរមួយរូបខ្ញុំពិតជាមានមោទនភាពមែនទែន ព្រោះពីមុនមកខ្ញុំមិនដែលបានឃើញរបស់ទាំងអស់នេះទេ។ ពេលនេះ ខ្ញុំបានឃើញនិងដឹងថាវាពិតជារបស់មានតម្លៃមែនទែន។ ខ្ញុំពិតជាសូមអរគុណចំពោះអាជ្ញាធរជាតិអប្សរាដែលបានអនុញ្ញាតឲ្យយើងខ្ញុំបានចូលមកឃើញ បានស្គាល់ បានប៉ះ បានរៀនសូត្រអំពីរបៀបថែរក្សានូវរបស់ដ៏មានតម្លៃនេះ”។

ប្រធាននៃអង្គភាពកុលាលភាជន៍អង្គរ គឺលោកបណ្ឌិត អ៊ា ដារិទ្ធ បានរៀបរាប់អំពីសាវតារនៃការបង្កើតអង្គភាពនេះថា ការសិក្សាអំពីកុលាលភាជន៍ខ្មែរ គឺបានចាប់ផ្តើមជាយូរឆ្នាំដែរហើយ តែការបង្កើតអង្គភាពកុលាលភាជន៍អង្គរនេះឡើង គឺចាប់ពីពេលដែលលោកបានធ្វើបទបង្ហាញនៅចំពោះមុខគណៈកម្មាធិការអាយស៊ីស៊ី-អង្គរ ក្នុងឆ្នាំ២០១៥។ ដោយមានការគាំទ្រពីសំណាក់គណៈកម្មាធិការអាយស៊ីស៊ី-អង្គរ និងឯកឧត្តម សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ព្រមទាំងថ្នាក់ដឹកនាំគ្រប់លំដាប់ថ្នាក់ ទើបអង្គភាពនេះត្រូវបានបង្កើតឡើង ចាប់ពីឆ្នាំ២០១៥មក ដើម្បីប្រមូលថែរក្សា និងសិក្សាលម្អិតអំពីបំណែកកុលាលភាជន៍ដែលក្រុមអ្នកស្រាវជ្រាវបានរកឃើញ។

លោកបណ្ឌិតបន្ថែមថា ចាប់តាំងពីបង្កើតមក អង្គភាពនេះទទួលបានការចូលមកសិក្សាស្រាវជ្រាវទាំងអ្នកស្រាវជ្រាវថ្នាក់ជាតិ និងអន្តរជាតិជាបន្តបន្ទាប់។ ស្ថាប័នសិក្សាអំពីកុលាលភាជន៍នៅអាមេរិក ក្រុមសិក្ខាកាមមកបារាំង និងក្រុមនិស្សិតខ្មែរមួយចំនួនទៀតក៏ធ្លាប់មកចូលមកសិក្សាអំពីការងាររបស់អង្គភាពនេះដែរ។ ជាគម្រោងអនាគត ប្រធានអង្គភាពរូបនេះមានបំណងចង់សហការជាមួយដៃគូអន្តរជាតិផ្សេងៗទៀតក្នុងតំបន់អង្គរ ដើម្បីប្រមូលបំណែកកុលាលភាជន៍ ដែលក្រុមអ្នកស្រាវជ្រាវបានប្រទះឃើញក្នុងអំឡុងពេលធ្វើកំណាយកន្លងមក ហើយរក្សាទុកក្នុងទីផ្សេងៗរៀងៗខ្លួន មកតម្កល់ទុកក្នុងអង្គភាពនេះតែមួយ ដើម្បីងាយស្រួលដល់អ្នកទស្សនា ក៏ដូចជាអ្នកស្រាវជ្រាវផ្សេងៗដែរ។ នៅពេលដែលកិច្ចសហការនេះបានជោគជ័យ លោកសង្ឃឹមថា អង្គភាពនេះនឹងទទួលបាននូវបំណែកវត្ថុបុរាណដ៏សន្ធឹកសន្ធាប់ ដែលរឹងរឹតតែធ្វើឲ្យអ្នកស្រាវជ្រាវ គ្រប់គ្នាកាន់តែងាយស្រួលនិងចាប់អារម្មណ៍កាន់តែខ្លាំងថែមទៀត៕










ក្រៅពីការយកចិត្តទុកដាក់លើការងារអភិរក្ស និងអភិវឌ្ឍន៍ប្រកបដោយចីរភាពក្នុងតំបន់រមណីយដ្ឋានអង្គរ ក្នុងនោះក៏បានយកចិត្តទុកដាក់ជាប្រចាំចំពោះសុខទុក្ខបងប្អូនប្រជាពលរដ្ឋដែលរស់នៅក្នុងតំបន់រមណីយដ្ឋាននោះផងដែរ។ ជាក់ស្តែងក្រុមការងារសហគមន៍នៃអាជ្ញាធរជាតិអប្សរាប្រចាំស្រុកបន្ទាយស្រី នៅព្រឹកថ្ងៃទី២៧ខែឧសភាឆ្នាំ២០១៦នេះ បាននាំយកនូវសម្ភារៈ និងគ្រឿងបរិភោគមួយចំនួន ដែលជាអំណោយដ៏ថ្លៃថ្លារបស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា និងលោកជំទាវ ទៅចែកជូនគ្រួសារដែលរងគ្រោះដោយអគ្គិភ័យ ភ្លើងឆេះផ្ទះស្ថិតនៅក្នុងភូមិតាឯក ឃុំតាឯក ស្រុកបន្ទាយស្រី ខេត្តសៀមរាប។
ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានបំពេញព្រះរាជបេសកកម្មប្រកបដោយភាពជោគជ័យលើទឹកដីនៃអតីតរាជធានីនៃអាណាចក្រខ្មែរ។ កាលពីថ្ងៃទី២៤ ខែឧសភា ឆ្នាំ២០១៦កន្លងទៅនេះ នាព្រះលានជល់ដំរីនៃទីក្រុងអង្គរធំដែលជាអតីតរាជធានីដ៏ឧត្តុង្គឧត្តមនាកំឡុងសតវត្សទី៩ដល់ទី១៥ បច្ចុប្បន្នស្ថិតក្នុងរមណីយដ្ឋានអង្គរ ព្រះអង្គបានយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីច្រត់ព្រះនង្គ័ល។ ព្រះរាជបេសកកម្មបន្ទាប់គឺ ព្រះអង្គទ្រង់យាងទៅបំពេញព្រះរាជទស្សនកិច្ចនៅតំបន់ប្រាសាទកោះកេរដែលក៏ជាអតីតរាជធានីក្នុងកំឡុងដើមសតវត្សទី១០ បច្ចុប្បន្នស្ថិតក្នុងខេត្តព្រះវិហារ ដើម្បីបួងសួងដល់ព្រះវិញ្ញាណក្ខន្ធអតីតព្រះមហាក្សត្រខ្មែរគ្រប់ជំនាន់ ដើម្បីប្រទានក្តីសុខដល់ប្រជានុរាស្ត្រទូទាំងនគរនៃព្រះរាជាណាចក្រកម្ពុជា។
ព្រះរាជពិធីច្រត់ព្រះនង្គ័លឆ្នាំនេះ ត្រូវបានរៀបចំឡើងនៅលើទឹកដីសៀមរាបអង្គរ នៅមុខព្រះលានជល់ដំរី នាព្រឹកថ្ងៃទី២៤ ខែឧសភា ឆ្នាំ២០១៦ ត្រូវនឹងថ្ងៃ៤រោច ខែពិសាខ ពុទ្ធសករាជ ២៥៦០ ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំ និងប្រជាពលរដ្ឋយ៉ាងច្រើនកុះករ។
ដើម្បីអបអរសាទរព្រះរាជពិធីច្រត់ព្រះនង្គ័ល ដែលប្រារព្ធឡើងនៅក្នុងបរិវេណមុខព្រះលានជល់ដំរី ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានោះ អាជ្ញាធរជាតិអប្សរានឹងចែកទឹកជូនបងប្អូនប្រជាពលរដ្ឋ និងភ្ញៀវទេសចរទាំងអស់ ដែលមកទស្សនាកម្មវិធីរយៈពេល៤ថ្ងៃដោយមិនគិតថ្លៃ គឺចាប់ពីថ្ងៃទី២៣រហូតដល់ថ្ងៃទី២៦ ខែឧសភា ឆ្នាំ២០១៦។ ទីតាំងចែកចាយទឹកមានពីរកន្លែងស្ថិតនៅផ្នែកខាងជើង និងខាងត្បូងនៃព្រះលានជល់ដំរី ដែលជាទីតាំងប្រារព្ធពិធី។
អាជ្ញាធរជាតិអប្សរា តាមរយៈក្រុមការងារសហគមន៍ប្រចាំស្រុកបា្រសាទបាគង នាព្រឹកថ្ងៃទី២៣ ខែឧសភានេះ បាននាំយកអំណោយសង្គ្រោះបឋមរបស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ទៅជូនប្រជាពលរដ្ឋមួយគ្រួសារដែលមានអាសយដ្ឋាននៅភូមិកញ្ជរ ឃុំរលួស ដែលរងគ្រោះដោយត្រូវខ្យល់ព្យុះដួលរលំផ្ទះទាំងស្រុង កាលពីដើមខែឧសភាកន្លងទៅ។

Speech of H. E. Ms. Phoeurng Sackona, President of APSARA National Authority

Weather Forecast

Angkor Code of Conduct

Angkor Code of Conduct's Video

Website Visitors

Now Online
:
15
Today
:
4814
Yesterday
:
5260
This Week
:
17984
This Month
:
0175873
Total
:
014235728