ព័ត៌មានថ្មីៗ

សកម្មភាពការងារសង្គ្រោះភ្ញៀវ និងរើសបានរបស់ភ្ញៀវរបស់ នាយកដ្ឋានអភិវឌ្ឍន៍ទេសចរណ៍នៃអាជ្ញាធរជាតិអប្សរា

បានផ្សាយនៅ ថ្ងៃទី 18 ខែ កក្កដា ឆ្នាំ2016 10:36 AM ដោយ ៖ អាជ្ញាធរជាតិអប្សរា

ភ្នាក់ងារទេសចរណ៍មានតួនាទីសំខាន់ណាស់ក្នុងការណែនាំទិសដៅទស្សនា មើល សកម្មភាពនានារបស់ទេសចរ ពន្យល់ណែនាំ ក៏ដូចជាជួយដោះស្រាយបញ្ហាផ្សេងៗដែលនឹង កើតឡើងជាយថាហេតុចំពោះអ្នកទស្សនាទាំងអស់ ក្នុងតំបន់អង្គរឱ្យពួកគេកក់ក្តៅ។

ក្នុងនោះ អ្វីដែលភ្នាក់ងារទេសចរណ៍តែងតែយកចិត្តទុកដាក់ជាប្រចាំ គឺការជួយ សង្គ្រោះភ្ញៀវទេសចរពេលមានគ្រោះថ្នាក់ និងការរើសបានរបស់ភ្ញៀវ។ បើយោងតាមរបាយ ការណ៍សកម្មភាពការងាររយៈពេល០៦ខែនៃឆ្នាំ២០១៦ របស់នាយកដ្ឋានអភិវឌ្ឍន៍ទេសចរណ៍ អង្គរនៃអាជ្ញាធរជាតិអប្សរា បានបង្ហាញថា ក្រុមការងារបានជួយសង្គ្រោះភ្ញៀវលើបញ្ហាដូចជា៖ ដួល គ្រិច ថ្លោះដៃជើង ខ្យល់គរ ងងឹតមុខ ប៉ះក្បាលនឹងហោជាង ឬរោងទង ដួលសន្លប់ ដោយ សារអាកាសធាតុក្តៅ និងសត្វស្វាខាំ។ តែបញ្ហាទាំងនេះមិនមានច្រើនទេនៅតំបន់អង្គរ ដែល ពេលខ្លះកើតឡើងដោយសារភ្ញៀវមានការធ្វេសប្រហែស មិនគោរពតាមការណែនាំ ឬស្លាក សញ្ញាហាមឃាត់ជាដើម។

ប៉ុន្តែទោះជាយ៉ាងណា ក៏ក្រុមការងារអាជ្ញាធរជាតិអប្សរាបានជួយសង្គ្រោះភ្ញៀវទាន់ពេលវេលាផងដែរ ដោយសហការជាមួយនគរបាលទេសចរណ៍និងនគរបាលបេតិកភណ្ឌ ជួយភ្ញៀវ ក្នុងករណីស្រាល តែបើក្នុងករណីរបួសធ្ងន់គឺបញ្ជូនទៅមន្ទីរពេទ្យ ដោយមានការឯកភាពពីភ្ញៀវ។ ទងនឹងការដោះស្រាយបញ្ហាខាងលើឱ្យកាន់តែមានប្រសិទ្ធភាព នាពេលកន្លងមកថ្មីៗនេះ អាជ្ញាធរជាតិអប្សរាក៏បានវគ្គបណ្តុះបណ្តាលប្រធានភ្នាក់ងារទេសចរណ៍ចំនួន២០រូបផងដែរអំពីការសង្រ្គោះបឋមដែលបង្រៀនដោយអ្នកជំនាញអាមេរិក ដើម្បីឱ្យបុគ្គលិកមានសមត្ថភាពច្បាស់លាស់ អាចសង្គ្រោះភ្ញៀវប្រកបដោយជំនាញ។

បើតាមការបញ្ជាក់ពីឯកឧត្តម សុខ សង្វារ អគ្គនាយករងអាជ្ញាធរជាតិអប្សរាថា នៅថ្ងៃអនាគតក្រុមការងារតាមប្រាសាទទាំងអស់ នឹងមានកាបូបសម្រាប់ដាក់ថ្នាំមួយចំនួននិងបង់រុំ របួសតាមខ្លួន ដើម្បីជួយដោះស្រាយបញ្ហាជូនភ្ញៀវបានភ្លាមៗនៅនឹងកន្លែង ព្រោះនៅថ្ងៃក្រោយតំបន់អង្គរកាន់តែល្បី កំណើនទេសចរណ៍នឹងកាន់តែកើនឡើង អាជ្ញាធរជាតិអប្សរាក៏ត្រូវតែយកចិត្តទុកដាក់ចំពោះភ្ញៀវកាន់តែខ្លាំងផងដែរ ដើម្បីបង្កើនភាពកក់ក្តៅនិងទំនុកចិត្តខ្ពស់ដល់ពួកគេ។ ឯកឧត្តមបន្តទៀតថា ពេលថ្មីៗមកនេះ អាជ្ញាធរជាតិអប្សរាក៏បានបន្ថែមក្រុមការងារនៅតាមបណ្តាប្រាសាទជាច្រើននាក់ទៀត ដើម្បីរាយការណ៍និងជួយសង្គ្រោះភ្ញៀវ យកចិត្តទុកដាក់ចំពោះភ្ញៀវបានកាន់តែទូលំទូលាយជាងមុន។

ចំណែកការរើសបានរបស់របរភ្ញៀវដែលភ្លេចនៅតាមបណ្តាប្រាសាទវិញ ក៏អាជ្ញាធរជាតិអប្សរា ក៏មានកិច្ចសហការយ៉ាងរលូនជាមួយនគរបាលទេសចរណ៍និងនគរបាលបេតិកភណ្ឌ ជួយស្វះស្វែងរកនិងប្រគល់ជូនម្ចាស់វិញបានយ៉ាងច្រើនករណី ដូចជា៖ ទូរសព្ទដៃ កាបូបស្ពាយ កាបូបលុយ ម៉ាស៊ីនថត កាតអេធីអ៊ឹម សំបុត្រឆ្លងដែន ជើងទម្រម៉ាស៊ីនថត។ល។ ចំពោះរបស់ដែលរកមិនឃើញ ភ្នាក់ងារទេសចរណ៍ក៏បានណែនាំភ្ញៀវឱ្យដាក់ពាក្យបណ្តឹងនៅអង្គភាពនគរបាលទេសចរណ៍។ រីឯករណីរកឃើញសម្ភារៈហើយ តែគ្មានម្ចាស់មករក ភ្នាក់ងារទេសចរណ៍បានធ្វើការប្រគល់ជូននគរបាលទេសចរណ៍ជាអ្នករក្សាទុក ដើម្បីរង់ចាំម្ចាស់ទាក់ទងមកទទួល។ ទង្វើទាំងនេះក៏ទទួលបាននូវការអរគុណ និងការកោតសរសើរយ៉ាងច្រើនពីសំណាក់អ្នកទេសចរជាតិនិងអន្តរជាតិមិនដាច់ពីមាត់ ព្រមទាំងការបង្ហាញពីការស្រឡាញ់ និងទំនុកចិត្តរបស់ពួកគេមកលើភ្នាក់ងារអាជ្ញាធរជាតិអប្សរានិងសមត្ថកិច្ចពាក់ព័ន្ធក្នុងតំបន់អង្គរទៀតផង។

ជាការពិតណាស់ ក្នុងនាមជាអ្នកមើលថែ គ្រប់គ្រង និងរៀបចំតំបន់អង្គរ អាជ្ញាធរជាតិអប្សរាតែងតែយកចិត្តទុកដាក់ជានិច្ចលើគ្រប់បញ្ហាដែលកើតឡើងនៅក្នុងតំបន់អង្គរ ពិសេសគឺសន្តិសុខ សុវត្ថិភាព សណ្តាប់ធ្នាប់ បរិស្ថាន និងភាពងាយស្រួលដល់ទេសចរ សំដៅធ្វើយ៉ាងណាគឺឱ្យទេសចរមកទស្សនាកម្ពុជាម្តងហើយ ចង់មកទស្សនាម្តងទៀត។ ម្យ៉ាងវិញទៀត ភាពសុចរិត ស្នាមញញឹម ការជួយឈឺឆ្អាលនឹងសុខទុក្ខរបស់ភ្ញៀវ ការយកចិត្តទុកដាក់នឹងសេវាកម្មចំពោះភ្ញៀវបានល្អ គឺជាផ្នែកមួយជួយលើកតម្លៃនិងកិត្តិយសនៃប្រទេសជាតិ ពិសេសគឺអាចទាក់ទាញទេសចរឱ្យមកទស្សនាប្រទេសរបស់យើងបានកាន់តែច្រើនផងដែរ៕
































 
“វប្បធម៌គឺជាសៀវភៅមួយក្បាល ដែលផ្ទុកដោយកំណត់ត្រាប្រវត្តិសាស្ត្រ ទំនៀមទម្លាប់ សាសនា និងប្រពៃណីរបស់យើង។ វិស័យទេសចរណ៍ គឺជាអ្នកបោះពុម្ព ដែលក្នុងនោះភ្ញៀវទេសចរគឺជាអ្នកអាន និងមគ្គុទ្ទេសក៍ទេសចរណ៍គឺជាអ្នកអត្ថាធិប្បាយ បកស្រាយសៀវភៅមួយក្បាលនេះ ឲ្យបានទូលំទូលាយដល់ភ្ញៀវទេសចរគ្រប់ជាតិសាសន៍”។ នេះជាប្រសាសន៍របស់ ឯកឧត្តម សុខ សង្វារ អគ្គនាយករងនៃអាជ្ញាធរជាតិអប្សរា និងជាប្រធានក្រុមការងារអនុវត្តផែនការគ្រប់គ្រងទេសចរណ៍អង្គរ នៅសណ្ឋាគារសោមាទេវីអង្គរ។
ភ្នំគូលែន ជាឧទ្យានជាតិមួយដែលបានបង្កើតនិងកំណត់ដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣ ឈ្មោះថា ឧទ្យានជាតិព្រះជ័យវរ្ម័ន-នរោត្តម ភ្នំគូលែន មានផ្ទៃដីសរុប ៣៧.៣៧៣ហិកតា។ យោងតាមទិន្នន័យស្រាវជ្រាវផ្ទាល់និងទិន្នន័យ LiDAR បានសន្និដ្ឋានថា ភ្នំគូលែនជាទីក្រុងបុរាណមួយដែលមានបុរាណដ្ឋានរាប់រយគួរឱ្យកត់សម្គាល់។
តាមការស្រាវជ្រាវ ដំបូលរោងទងនៃប្រាសាទអង្គរវត្តទាំងអស់សុទ្ធតែមានពិតានឈើ ដែលបុព្វបុរសបានឆ្លាក់ក្បាច់ភ្ជាប់នឹងដំបូល ប៉ុន្តែពិតានទាំងនោះបានរបេះធ្លាក់ជាបន្តបន្ទាប់ដោយសារពេលវេលា និងអាយុកាលដ៏យូរលង់។ អ្នកជំនាញនៃអាជ្ញាធរជាតិអប្សរាបានសិក្សាពីទម្រង់នៃពិតានទាំងនោះឡើងវិញ តាមបំណែកដែលមាននៅសេសសល់ខ្លះ ហើយបានសហការជាមួយស្ថាប័នអន្តរជាតិដើម្បីធ្វើពិតានឈើថ្មីទៅជំនួសវិញ។ ក្នុងកិច្ចប្រជុំគណៈកម្មាធិការអាយស៊ីស៊ីអង្គរកន្លងទៅថ្មីៗនេះ សំណើឆ្លងយោបល់ដើម្បីបំពាក់ពិតានឈើនៅរោងទងកូរសមុទ្រទឹកដោះនៃប្រាសាទអង្គរវត្ត បានទទួលការអនុម័តជាផ្លូវការហើយ។
ព្រៃឈើមានគុណសម្បត្តិច្រើនណាស់ សម្រាប់មនុស្សជាតិ បើទោះបីជាព្រៃឈើមិនមានដៃជើងជួយដោយផ្ទាល់ក៏ដោយ តែជួយដោយប្រយោល ជាពិសេសជាងនេះទៀតនោះ “ ព្រៃឈើក៏បានជួយទ្រទ្រង់ថែទាំដល់ប្រាង្គប្រាសាទនានាក្នុង និងក្រៅតំបន់រមណីយដ្ឋានអង្គរផងដែរ”។ នេះបើតាមការលើឡើងរបស់ លោកបណ្ឌិត ថូម៉ាស វ័រសេដ ( THORMAS WARSCHEID) កាលពីរសៀលថ្ងៃសុក្រ ទី២៥ ខែមិថុនា ឆ្នាំ២០១៦ នៅសាលបណ្តុះបណ្តាលអង្គរ-អាជ្ញាធរជាតិអប្សរា។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
10
ថ្ងៃនេះ
:
12819
ម្សិលមិញ
:
13174
សប្តាហ៍នេះ
:
55448
ខែនេះ
:
0213337
សរុប
:
014273192