ព័ត៌មានថ្មីៗ

អាជ្ញាធរជាតិអប្សរាសហការជាមួយអាជ្ញាធរមូលដ្ឋានស្រុកអង្គរធំដាំកូនឈើចំនួន១០០០ដើមនៅលើខ្នងទំនប់បារាយណ៍ក្រចាប់

បានផ្សាយនៅ ថ្ងៃទី 14 ខែ កក្កដា ឆ្នាំ2016 02:14 PM ដោយ ៖ អាជ្ញាធរជាតិអប្សរា
ឯកឧត្តម សឺង គង់ ទីប្រឹក្សានៃអាជ្ញាធរជាតិអប្សរានិងមន្ត្រី/បុគ្គលិកអាជ្ញាធរជាតិអប្សរាមួយចំនួនទៀតបានចូលរួមក្នុងពិធីដាំកូនឈើជាមួយនឹងអាជ្ញាធរស្រុក ឃុំ ភូមិ លោកគ្រូអ្នកគ្រូ សិស្សានុសិស្ស និង ប្រជាពលរដ្ឋយ៉ាងច្រើនកុះករនៅលើខ្នងទំនប់បារាយណ៍ក្រចាប់ជាប់នឹងវិទ្យាល័យអង្គរធំស្ថិតនៅភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប នាថ្ងៃទី១៤ ខែកក្កដាឆ្នាំ២០១៦។

នៅក្នុងពិធីដាំកូនឈើនេះ ឯកឧត្តម សឺង គង់ បានមានប្រសាសន៍ថា ដោយការស្នើសុំកូនឈើពីលោកនាយកសាលា និងអាជ្ញាធរមូលដ្ឋានមកអាជ្ញាធរជាតិអប្សរាទើបនាយកដ្ឋានគ្រប់គ្រងព្រៃឈើ ទេសភាពវប្បធម៌និងបរិស្ថានបានកូនឈើចំនួន១០០០ដើមមានប្រភេទ កូនបេង គគីរ ឈើទាល អង្កាញ់ និងក្ងោក ដើម្បីយកទៅដាំលើខ្នងទំនប់បារាយណ៍ក្រចាប់ដែលមានទំហំផ្ទៃដីបណ្តោយ៥០០ម៉ែត្រ និងទទឹង៥០ម៉ែត្រដើម្បីការពារការហូរច្រោះដីទៅក្នុងបារាយណ៍ ក៏ដូចជាការលើកសម្រស់សោភណភាពបុរាណដ្ឋាន និងប្រាង្គប្រាសាទក្នុងការទាក់ទាញភ្ញៀវទេសចរឲ្យទស្សនាផង។

ឯកឧត្តមបានបន្តថា ‍«ព្រៃឈើមានសារៈសំខាន់ និងផលប្រយោជន៍ខ្លាំងណាស់ចំពោះមនុស្ស សត្វ ជាក់ស្តែងដូចយើងបានដឹងស្រាប់ហើយថានៅក្នុងរដូវប្រាំងកន្លងទៅថ្មីៗនេះ អាកាសធាតុមានការឡើងកម្តៅយ៉ាងខ្លាំងដែលយើងមិនដែលធ្លាប់ជួបប្រទះទេនៅក្នុងប្រទេសកម្ពុជាយើង ហើយទន្ទឹមគ្នានេះដែរ ក៏មានប្រទេសមួយចំនួនដល់ថ្នាក់មានមនុស្សស្លាប់ផងក៏មានដែរ។ នេះ ដោយសារតែការបាត់បង់ព្រៃឈើដែលជាចំណែកមួយជួយថែរក្សាឲ្យមានលំនឹងរវាងបរិយាកាសជាមួយព្រៃឈើ។ ព្រៃឈើអាចរស់នៅបានដោយគ្មានមនុស្ស ប៉ុន្តែមនុស្សមិនអាចរស់នៅបានដោយគ្មានព្រៃឈើបានទេ»។

លោក ឡុង រដ្ឋារក្ស អភិបាលស្រុកអង្គរធំបានសំណូមពរឲ្យលោកមេឃុំ មេភូមិ នាយកសាលាសហការគ្នារៀបចំជាក្រុមថែរក្សា និងយាមកាមល្បាតឃ្លាំមើលកូនឈើជាប្រចាំដើម្បីមើលថែខ្លាចក្រែងមានកូនឈើណាមួយងាប់យើងយកកូនឈើថ្មីទៅជួសឡើងវិញ និងម្យ៉ាងវិញទៀត ក្រែងមានប្រជាពលរដ្ឋណាយកកូនឈើធ្វើជាស្នឹងគោនាំឲ្យកូនឈើងាប់ ហើយធ្វើការណែនាំពួកគាត់កុំឲ្យធ្វើបែបនេះតទៅទៀត។ លោកបានបញ្ជាក់ថា «ការដាំគឺជាការងាយស្រួលទេតែការថែរក្សាគឺជាការលំបាក»។

លោកមេឃុំ មេភូមិ នាយកសាលា សិស្សានុសិស្សនិងប្រជាពលរដ្ឋបានធ្វើការប្តេជ្ញាចិត្តថានឹងចូលរួមដាំកូនឈើឲ្យបានច្រើន និងជួយថែរក្សាការពារកូនឈើមិនឱ្យងាប់ទេ ដើម្បីចូលរួមចំណែកកាត់បន្ថយភាពរាំងស្ងួត ការកើនឡើងនូវកម្តៅ និងការពារបរិស្ថានជាមួយរាជរដ្ឋាភិបាលក៏ដូចជាពិភពលោកទាំងមូល។មួយវិញទៀត ការដាំកូនឈើនេះ វាបានជួយកាត់បន្ថយសារធាតុពុល ជួយឲ្យភូមិ ឃុំ ស្រុកមានភាពត្រជាក់ត្រជុំ និងបង្កើនសោភណភាពដ៏ស្រស់បំព្រងដល់ភូមិឃុំស្រុកក៏ដូចជាប្រាង្គប្រាសាទព្រមទាំងបុរាណដ្ឋានយើងផងដែរ។

នេះមិនមែនជាលើកទីមួយទេ ដែលអាជ្ញាធរជាតិអប្សរាបានផ្តល់កូនឈើ និងចូលរួមដាំកូនឈើជាមួយអាជ្ញាធរនិងប្រជាពលរដ្ឋ ជាក់ស្តែងដូចជាកាលថ្ងៃទី០៨ខែកក្កដាឆ្នាំ២០១៦កន្លងទៅថ្មីៗនេះ អាជ្ញាធរជាតិអប្សរាក៏បានចូលរួមដាំកូនឈើជាមួយអាជ្ញាធរស្រុក ឃុំ ភូមិ ព្រះសង្ឃ លោកគ្រូអ្នកគ្រូ សិស្សានុសិស្ស និងប្រជាពលរដ្ឋនៅភូមិជីក្រែង ឃុំជីក្រែង ស្រុកជីក្រែងខេត្តសៀមរាប។ អាជ្ញាធរជាតិអប្សរាតែងតែយកចិត្តទុកដាក់ចំពោះបរិស្ថានមិនថាក្នុងតំបន់រមណីយដ្ឋានអង្គរឬក្រៅតំបន់រមណីយដ្ឋាននោះទេ។

អាជ្ញាធរជាតិអប្សរាសូមគាំទ្រនិងលើកទឹកចិត្តយ៉ាងពេញទំហឹងចំពោះសកម្មភាពដាំកូនឈើ និងការថែរក្សាការពារព្រៃឈើ ហើយជាមួយគ្នានេះដែរ អាជ្ញាធរជាតិអប្សរាសូមអំពាវនាវដល់គ្រប់ស្ថាប័នទាំងអស់មិនថាអាជា្ញធរដែនដី ព្រះសង្ឃ លោកគ្រូអ្នកគ្រូ និងប្រជាពលរដ្ឋទេ ដែលចង់បានកូនឈើយកទៅដាំ សូមទាក់ទងមកមជ្ឈមណ្ឌលអាជា្ញធរជាតិអប្សរា អាជ្ញាធរជាតិអប្សរានឹងផ្តល់ជូនកូនឈើតាមសំណូមពរ តិចច្រើនតាមលទ្ធភាពជាក់ស្តែង។










នៅថ្ងៃទី៨ ខែកក្កដា ឆ្នាំ២០២០ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈនិងជាប្រធានក្រុមប្រឹក្សាភិបាលអាជ្ញាធរជាតិអប្សរា រួមនឹងថ្នាក់ដឹកនាំអាជ្ញាធរជាតិអប្សរាបានចូលរួមប្រជុំអន្តរក្រសួងដើម្បីពិភាក្សាលើពង្រាងផែនការមេវិស័យទេសចរណ៍ខេត្តសៀមរាបឆ្នាំ២០២០-២០៣៥ នាសណ្ឋាគាររីជិនស៊ីអង្គរ។
នាល្ងាចថ្ងៃទី៧ ខែកក្តដា ឆ្នាំ២០២០ លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងជាប្រធានក្រុមប្រឹក្សាភិបាលអាជ្ញាធរជាតិអប្សរា បានអញ្ជើញចូលក្រាបបង្គំសួរសុខទុក្ខ និងប្រគេនទៀនព្រះវស្សា ព្រមទាំងទេយ្យទានមួយចំនួនដល់ព្រះមហាវិមលធម្ម ពិន សែម រាជាគណៈថ្នាក់ទោ និងជាឧត្តមទីប្រឹក្សាគណៈសង្ឃនាយកនៃព្រះរាជាណាចក្រកម្ពុជា និងជាព្រះចៅអធិការវត្ត រាជបូណ៌ និងជាព្រះប្រធានកិត្តិយសនៃក្រុមប្រឹក្សាវត្តអារាម។
នារសៀលថ្ងៃទី០៧ ខែកក្តដា ឆ្នាំ២០២០ នៅស្នាក់ការអាជ្ញាធរជាតិអប្សរា ក្រោមអធិបតីភាពលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា និងថ្នាក់ដឹកនាំអាជ្ញាធរជាតិអប្សរា បានបើកកិច្ចប្រជុំពិភាក្សានិងពិនិត្យពង្រាងផែនការមេវិស័យទេសចរណ៍។
ព្រៃឈើ គឺផ្នែកមួយដ៏សំខាន់ក្នុងរមណីយដ្ឋានអង្គរ និងបានបំពេញតួនាទីស្នូលក្នុងការបង្កើនគម្របព្រៃឈើ បរិស្ថាន និងអភិរក្សក្នុងរមណីយដ្ឋានអង្គរ។ ក្នុងន័យនេះ ស្ថានីយបណ្ដុះកូនឈើ៨ហិកតា ជាស្ថានីយមួយក្នុងចំណោមស្ថានីយទាំង៤ របស់អាជ្ញាធរជាតិអប្សរាក្នុងការងារបណ្ដុះកូនឈើសម្រាប់ដាំដុះទាំងក្នុងតំបន់រមណីយដ្ឋានអង្គរ និងចែកចាយជូនទៅដាំនៅខាងក្រៅរមណីយដ្ឋានអង្គរ។
អាជ្ញាធរជាតិអប្សរាមានកិត្តិយសសូមជម្រាបជូនសាធារណជនមេត្តាជ្រាបថា ឈ្មោះ ឡាយ ពិសិដ្ឋ ត្រូវបានលុបឈ្មោះចេញពីបុគ្គលិករបស់នាយកដ្ឋានសណ្តាប់ធ្នាប់និងសហប្រតិបត្តិការនៃអាជ្ញាធរជាតិអប្សរា ចាប់ពីថ្ងៃទី០១ ខែកក្កដា ឆ្នាំ២០២០តទៅ ដោយមូលហេតុប្រព្រឹត្តកំហុសធ្ងន់ធ្ងរ៕
ដើមដំបូងមុន12345...328329បន្ទាប់ចុងក្រោយ

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
7
ថ្ងៃនេះ
:
2210
ម្សិលមិញ
:
17878
សប្តាហ៍នេះ
:
105050
ខែនេះ
:
0222349
សរុប
:
011684945