ព័ត៌មានថ្មីៗ

អាជ្ញាធរជាតិអប្សរាចូលរួមផ្សព្វផ្សាយក្នុងព្រឹត្តិការណ៍ពិព័រណ៍ការងារនៅវិទ្យាល័យបាគង

បានផ្សាយនៅ ថ្ងៃទី 27 ខែ ឧសភា ឆ្នាំ2016 03:12 PM ដោយ ៖ អាជ្ញាធរជាតិអប្សរា

ពិព័រណ៍ការងារដើម្បីតម្រង់ទិសក្នុងការសិក្សារបស់ប្អូនៗសិស្សានុសិស្ស ត្រូវបានរៀបចំឡើង ដោយអង្គការថែរក្សាដើម្បីកម្ពុជា Caring for Cambodia(CFC) និងវិទ្យាល័យផ្សេងៗ ព្រមទាំងមានការចូលរួមពីបណ្តាស្ថាប័នជាច្រើន។ ពិព័រណ៍បានរៀបចំនៅវិទ្យាល័យបាគង នាព្រឹកថ្ងៃទី២៧ ខែឧសភា ឆ្នាំ២០១៦។ អាជ្ញាធរជាតិអប្សរាក៏បានចូលរួមចំពោះការផ្សព្វផ្សាយនេះ ដោយមានមន្ត្រីជំនាញជាអ្នកពន្យល់ដោយផ្ទាល់ លើការងារគ្រប់គ្រង អភិរក្ស និងអភិវឌ្ឍន៍ប្រកបដោយចីរភាពចំពោះរមណីយដ្ឋានអង្គរ ដែលជាបេតិកភណ្ឌពិភពលោក។

មន្ត្រីជំនាញបានឆ្លើយតបចំពោះសំណួរជាច្រើនរបស់ប្អូនៗសិស្សានុសិស្ស ដែលមានបំណងស្វែងយល់លើការបំពេញភារកិច្ចរបស់អាជ្ញាធរជាតិអប្សរា។ ម្យ៉ាងទៀត ប្អូនៗសិស្សានុសិស្សភាគច្រើន បានចាប់អារម្មណ៍ពីការងារអភិរក្ស និងជួសជុលប្រាង្គប្រាសាទ ក៏ដូចជាការស្តារឡើងវិញនូវប្រព័ន្ធធារាសាស្ត្រសម័យបុរាណជាដើម។ ប្អូនៗមួយចំនួនទៀត ក៏បានចាប់អារម្មណ៍នឹងវិស័យទេសចរណ៍ ដែលបានរួមចំណែកយ៉ាងសំខាន់ក្នុងការអភិវឌ្ឍមូលដ្ឋានជាពិសេសតំបន់ឧទ្យានអង្គរ ដែលក្រុមគ្រួសាររបស់ប្អូនៗ កំពុងរស់នៅ និងប្រកបមុខរបរផ្សេងៗដោយផ្ទាល់ជាមួយវិស័យនេះ។

ប្អូនស្រី ទូច រត្នណា ជាសិស្សថ្នាក់ទី១២នៃវិទ្យាល័យបាគង បានសម្តែងនូវមោទនភាពក្រោយពីបានស្តាប់បទបង្ហាញរបស់អាជ្ញាធរជាតិអប្សរាស្តីពីតម្លៃសម្បត្តិបេតិកភណ្ឌជាតិ និងការងាររបស់អាជ្ញាធរជាតិអប្សរារួចមក។ ប្អូនស្រីនិងសិស្សានុសិស្សទាំងអស់ក៏បានសម្តែងនូវអំណរគុណចំពោះអាជ្ញាធរជាតិអប្សរា ដែលបានផ្តល់នូវចំណេះដឹងនិងបទពិសោធន៍ល្អៗសម្រាប់រូបប្អូនស្រីក៏ដួចជាសិស្សានុសិស្សដទៃទៀត ហើយប្អូនស្រីនិងសិស្សានុសិស្សទាំងអស់គ្នាបានប្តេជ្ញាចិត្តថានឹងខិតខំរៀនសូត្រ ដើម្បីយកចំណេះដឹងមករួមចំណែកក្នុងកិច្ចការថែរក្សាការពារនិងអភិរក្សសម្បត្តិវប្បធម៌បេតិកភណ្ឌឲ្យបានស្ថិតស្ថេរគង់វង្ស។

កម្មវិធីផ្សព្វផ្សាយពិព័រណ៍ការងារដើម្បីតម្រង់ទិសក្នុងការសិក្សានៅពេលនេះ មានប្រយោជន៍យ៉ាងខ្លាំងចំពោះការបញ្រ្ជាបនូវចំណេះដឹង ក៏ដូចជាផ្តល់នូវបទពិសោធន៍ដល់ប្អូនៗសិស្សានុសិស្ស ដែលជាទំពាំងស្នងឫស្សីនាពេលអនាគត។ អាជ្ញាធរជាតិអប្សរាសូមគាំទ្រចំពោះសកម្មភាពនេះ និងសកម្មភាពផ្សេងៗទៀត ដែលមានប្រយោជន៍ដល់សហគមន៍ក្នុងឧទ្យានអង្គរ ក៏ដូចជាប្រយោជន៍ដល់សង្គមជាតិទាំងមូល៕






អាជ្ញាធរជាតិអប្សរាសហការជាមួយវិទ្យាស្ថានសិក្សាអាស៊ីអាគ្នេយ៍ រៀបចំធ្វើបទបង្ហាញ ស្តីពីលទ្ធផលបឋមថ្មីៗ ពីការស្រាវជ្រាវបុរាណវិទ្យានៅកោះកែរ ដែលដឹកនាំដោយលោកបណ្ឌិត អ៊ា ដារិទ្ធ ជាអនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារនៃអាជ្ញាធរជាតិអប្សរានិងលោកបណ្ឌិត Kyle Latinis បុរាណវិទូនៃវិទ្យាស្ថានសិក្សាអាស៊ីអាគ្នេយ៍ប្រទេសសង្ហិបុរី ដែលនឹងប្រព្រឹត្តទៅ នៅថ្ងៃអង្គារទី២១ ខែមិថុនា ឆ្នាំ២០១៦ វេលាម៉ោង ១៤:៣០នាទីរសៀល នៅសាលសិក្សាលលៃនៃមជ្ឈមណ្ឌលបណ្តុះបណ្តាលអង្គរ នៃអាជ្ញាធរជាតិអប្សរា។
នៅថ្ងៃសុក្រទី២៤ ខែមិថុនា ឆ្នាំ២០១៦ ខាងមុខនេះ អាជ្ញាធរជាតិអប្សរានឹងរៀបចំសិក្ខាសាលាមួយ ក្រោមប្រធាន “ការអភិរក្ស និងបញ្ហាប្រឈមនៅភ្នំគូលែន”។ សិក្ខាសាលានេះនឹងមានការចូលរួមពីវាគ្មិនសំខាន់ៗដូចជា ឯកឧត្តម Tsugawa Takahisa សហប្រធានអាយស៊ីស៊ីអង្គរភាគីជប៉ុន លោកសាស្ត្រាចារ្យ Azedine Beshaouch លេខាវិទ្យាសាស្ត្រនៃគណៈកម្មាធិការអាយស៊ីស៊ីអង្គរ មន្ត្រីជំនាញនៃក្រសួងបរិស្ថាន រួមនឹងមន្ត្រីជំនាញជាច្រើនរូបទៀតនៃអាជ្ញាធរជាតិអប្សរា និងស្ថាប័នស្រាវជ្រាវផ្សេងៗ។ សិក្ខាសាលានេះ នឹងដំណើរការចាប់ពីម៉ោង ៧:៤៥នាព្រឹក ដល់ម៉ោង១២ថ្ងៃត្រង់ នៅសាលសន្និសីទអង្គរនៃអាជ្ញាធរជាតិអប្សរា។
ក្រុមមគ្គុទ្ទេសក៍ទេសចរណ៍ចំនួន២០រូបនិងមន្ត្រីអាជ្ញាធរជាតិអប្សរាចំនួន៤រូប បានចេញដំណើរទៅចូលរួមវគ្គបណ្តុះបណ្តាលមគ្គុទ្ទេសក៍ទេសចរណ៍នៅទីក្រុងម៉ាកាវ សាធារណរដ្ឋប្រជាមានិតចិននៅថ្ងៃទី១៣ ខែមិថុនា ឆ្នាំ២០១៦នេះ។
មនុស្សម្នាស្ទើរពេញពិភពលោកដែលបានមកដល់ប្រទេសកម្ពុជា ទាំងអ្នកបុរាណវិទ្យា អ្នកនរវិទ្យា អ្នកប្រវត្តិវិទ្យា មគ្គុទេសនក៍ទេសចរណ៍ ព្រមទាំងភ្លៀវទេសចរ នាំគ្នាឆ្ងល់ទាក់ទង់នឹងទៅនឹងជីវភាពនៃការរស់នៅរបស់មនុស្សសម័យដើម ជាពិសេសគឺមនុស្សដែលរស់នៅក្នុងសម័យកសាងប្រាសាទអង្គរវត្ត មានកម្លាំងពលំ និងការច្នៃប្រឌិតខ្ពស់។
ឆ្លងផុតរដូវវស្សាឆ្នាំនេះហើយ ការជួសជុលសារមន្ទីរព្រះនរោត្តមសីហនុអង្គរ ដែលធ្វើឡើងដោយកិច្ចសហការរវាងអាជ្ញាធរជាតិអប្សរា និងមូលនិធិក្លឹប១%នៃក្រុមហ៊ុនអ៊ីងអុង(AEON) របស់ប្រទេសជប៉ុននឹងដំណើរការហើយ។ មុននឹងឈានដល់ដំណាក់កាលជួសជុលនេះ នាយកប្រតិបត្តិនៃក្រុមហ៊ុនអ៊ីអុង លោក Keiichi Tadaki បានចំណាយពេលមួយព្រឹក នាថ្ងៃទី១២ ខែឧសភា ឆ្នាំ២០១៦នេះ ដើម្បីចូលទស្សនាសារមន្ទីរព្រះនរោត្តមសីហនុអង្គរ។ ទទួលដំណើរទស្សនារបស់លោកនាយកប្រតិបត្តិនៅពេលនេះមាន ឯកឧត្តម ឈរ ថាណាត អគ្គនាយករងនៃអាជ្ញាធរជាតិអប្សរា លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន លោក យិត ចាន់ដារដ្ឋ ប្រធានស្តីទីនៃនាយកដ្ឋានអភិវឌ្ឍន៍វប្បធម៌ សារមន្ទីរ និងបទដ្ឋានបេតិកភណ្ឌ និងមន្ត្រីមួយចំនួនទៀតនៃអាជ្ញាធរជាតិអប្សរា។

ប្រសាសន៍លោកជំទាវប្រធានអាជ្ញាធរជាតិអប្សរា

ការព្យាករណ៍​អាកាសធាតុ

ក្រមប្រតិបត្តិអង្គរ / Angkor Code of Conduct (Width = 230)

វីដេអូក្រមប្រតិបត្តិអង្គរ

អ្នកទស្សនាគេហទំព័រ

កំពុងទស្សនា
:
5
ថ្ងៃនេះ
:
1177
ម្សិលមិញ
:
5850
សប្តាហ៍នេះ
:
71237
ខែនេះ
:
0227318
សរុប
:
012734907